ދަ ވެސްޓިން މޯލްޑިވްސް މިރިއަންދޫ (ބ. މިރިއަންދޫ) އަށް ޖެއްސި ފަހުން މައްސަލަތަކެއް ދިމާވީ ޓްރާންސް މޯލްޑިވިއަން އެއާވޭސް (ޓީއެމްއޭ) ގެ ސީޕްލޭނުގައި ދަބަރު ޖަހާފައި ހުރި ކަން ސިވިލް އޭވިއޭޝަން އޮތޯރިޓީގެ ތަހުގީގުން ދައްކައިފި އެވެ.

ޓޫރިސްޓުންނާ އެކީ ދަތުރުކުރަމުން ދިޔަ ޓީއެމްއޭގެ އެ ބޯޓަށް މައްސަލަ ދިމާވީ، މިރިއަންދޫއަށް ޖެއްސުމަށް ފަހު ފަހަތަށް ޖަހަން އުޅުމުގެ ތެރޭގަ އެވެ.

ސިވިލް އޭވިއޭޝަނުން ތައްޔާރުކޮށްފައިވާ މި ހާދިސާގެ ޕްރިލިމިނަރީ ރިޕޯޓުގައިވާ ގޮތުގައި ސީޕްލޭންގެ ފްލޯޓަށް ގިނަ ގެއްލުންތަކެއް ލިބިފައިވާ ކަން ފާހަގަކުރެވުނެވެ. އެ ރިޕޯޓުގެ ހޯދުންތަކުގައި މިގޮތުން ލިބުނު ގެއްލުންތަކުގެ ތެރޭގައި ފާހަގަކޮށްފައި ކަންކަމަކީ:

• ފްލޯޓު އެސެމްބްލީއަށް ލޮލަށް ފެންނަން ހުރި ގެއްލުންތައް ވެފައިވުން
• ރިއާ ސްޕްރޭޑާ ބާ އެޓޭޗުކުރާ ބޯލްޓު ނެތުން
• ރިއާ ފްލޯޓުގެ އެފްޓް ސްޕްރެޑާ ބާ އާއި ފްލޯޓު އެޓޭޗުމަންޓުގެ ފިޓިންއަށް ގެއްލުން ލިބިފައި
• ކަނާތު ބުރަފަތިން ޖެހި ކަނާތު ކަނދު ހަލާކުވުން
• ވާތް ފަޅީގައި ފްލައިވަޔާ ލެނބިފައި އަދި ކަނާތް ފަޅީގެ ފްލައިވަޔާ ކަނޑައިގެން ގޮސްފައި

ސިވިލް އޭވިއޭޝަނަށް މިކަންކަން ފާހަގަކުރެވުނީ، އެކްސިޑެންޓަށް ފަހު އެޅި ފިޔަވަޅުތަކުގެ ތެރެއިން ކުރިއަށް ގެންދިޔަ އިންސްޕެކްޝަނުގަ އެވެ. މި އިންސްޕެކްޝަނުގައި އެ އިދާރާއިން އެންމެ ބޮޑަށް ބެލީ މަތިންދާބޯޓުގައި ދަބަރު ޖެހުމުގެ ސަބަބުން އެއްވެސް ގެއްލުމެއް ލިބިފައިވޭތޯ އެވެ.

ރިޕޯޓާއެކީ އާންމުކޮށްފައިވާ ފޮޓޯތަކުން ފެންނަ ގޮތުގައި މަތިންދާބޯޓުގައި ކަނދު ހަރުކުރަން ބޯލްޓު ޖަހަން ހުންނަ ތަންތަނުގައި ގަދަޔަށް ދަބަރު ޖަހާފައި ހުއްޓެވެ.

މި ހާދިސާ ހިނގިިއިރު، ބޯޓުގައި ތިބި އެއްވެސް ޓޫރިސްޓަކަށް ނޫނީ ފަޅުވެރިންނަށް ހާނިއްކައެއް ނުލިބެ އެވެ.