ނ. ހެނބަދޫގައި ފުލުހެއްގެ ސައިކަލެއްގައި ރޯކޮށްލި މައްސަލައިގައި ދެ މީހުން ކޯޓު އަމުރެއްގެ ދަށުން މިއަދު ހައްޔަރުކޮށްފި އެވެ.

ފުލުހުން ބުނީ އެ ދެ މީހުން ހައްޔަރުކުރީ ހެނބަދޫގައި ފުލުހެއްގެ ސައިކަލަކަށް ގެއްލުން ދީ، އިތުރު ފުލުހެއްގެ ސައިކަލު ރޯކޮށްލި މައްސަލައާ ގުޅިގެން ކަމަށެެ.

އެ ދެ މީހުންނަށް ހެނބަދޫ ޕޮލިސް ޕޯސްޓުގައި މަސައްކަތް ކުރާ ފުލުހުންނާއި، ފުލުހުންގެ އާއިލާތަކުގެ އިތުރުން މުދަލަށް ގެއްލުން ދޭނެ ކަމުގެ އިންޒާރު ދީފައިވާ ކަމަށް ވެސް ފުލުހުން ބުނެ އެވެ.

ފުލުހުންގެ ސައިކަލުތަކުގައި ރޯކޮށްލައި ގެއްލުން ދީފައި ވަނީ ހެނބަދޫގައި ފުލުހުން މަސްތުވާތަކެއްޗާ ދެކޮޅަށް ހިންގަމުންދާ އޮޕަރޭޝަންގެ ސަބަބުން ކަމަށް ތުހުމަތު ކުރެވޭ ކަމަށް ފުލުހުން ކުރިން ބުނި އެވެ.

މި ހާދިސާއާ ގުޅިގެން ފުލުހުން ބުނީ އެފަދަ ފިނޑި އަމަލުތަކުގެ ސަބަބުން ފުލުހުންގެ ހިތްވަރާއި ސާބިތު ކަމަށް ކުޑަ ވެސް ބަދަލެއް ނާންނާނެ ކަމަށެވެ.