އަންނަ ނޮވެމްބަރު މަހު އޮންނަ އެމެރިކާގެ އިންތިހާބުގައި ޑިމޮކްރެޓިކް ޕާޓީގެ ޓިކެޓު އެ ގައުމުގެ ނައިބުރައީސް ކަމަލާ ހެރިސްއަށް ކަށަވަރުވެއްޖެ އެވެ.

ޑިމޮކްރެޓިކް ނެޝަނަލް ކޮމިޓީގެ ޗެއާ ޖޭމީ ހެރިސަން ވިދާޅުވީ ޓިކެޓު ދިނުމާ ގުޅޭގޮތުން ހޯމަ ދުވަހާ ހިސާބަށް ކުރިއަށްދާ އޮންލައިން ވޯޓިންގައި މެޖޯރިޓީ މެންބަރުންގެ ވޯޓު ކަމަލާއަށް ލިބިފައިވާ ކަމަށެވެ.

"ފަހުރުވެރިކަމާއެކު ބުނަން އެނގޭ އެއްޗަކީ މެންބަރުންގެ ތެރެއިން ކަމަލާއަށް މެޖޯރިޓީ ވޯޓު ލިބިފައިވާކަން،" ހެރިސަން ވިދާޅުވި އެވެ.

އެކަމާ ގުޅިގެން ކަމަލާ ސޯޝަލް މީޑިއާގައި ކުރި ޕޯސްޓެއްގައި ވިދާޅުވީ ޑިމޮކްރެޓުންގެ ނޮމިނީއަކަށްވުމަކީ ލިބޭ އުފަލެއް ކަމަށާއި ރަސްމީކޮށް އަންނަ ހަފުތާގައި ނޮމިނޭޝަން ގަބޫލުކުރައްވާނެ ކަމަށެވެ.

އިންތިހާބުގައި ޑިމޮކްރެޓުންގެ ފަރާތުން ވާދަކުރައްވާނެ ކެންޑިޑޭޓަކު ކަނޑައަޅަން ޖެހުނީ، ކެންޑިޑެންސީ ލިބުނު އެމެރިކާގެ ރައީސް ޖޯ ބައިޑެން އެ ފުރުސަތު ދޫކޮށްލެއްވުމާ ގުޅިގެންނެވެ.

އެއަށްފަހު ކަމަލާއަށް ކެމްޕެއިން ހިންގުމަށް ވަނީ 310 މިލިއަން ޑޮލަރު މިހާތަނަށް ލިބިފަ އެވެ. ނަމަވެސް މިދިޔަ މަހު ޓްރަމްޕްއަށް ލިބިފައި ވަނީ 138.7 މިލިއަން ޑޮލަރެވެ.

ނޮވެމްބަރު، 5 ގައި އޮންނަ އިންތިހާބުގައި ޑިމޮކްރެޓުންގެ އިތުރުން ވާދަކުރަނީ ރިޕަބްލިކްގެ ކެންޑިޑޭޓް ޑޮނަލްޑް ޓްރަމްޕް އެވެ.