ޒިއުރިކް (އޮގަސްޓް 2) - އަންނަ އަހަރު ބާއްވަން މަސައްކަތް ކުރަމުން އަންނަ، 32 ޓީމު ވާދަކުރާ ފީފާ ކްލަބް ވޯލްޑް ކަޕާއި މެދު ދުނިޔޭގެ ކްލަބް ފުޓްބޯޅައިގެ އެކި ލީގުތައް ތަމްސީލްކުރާ ޖަމިއްޔާ އާއި ފީފާއާ މެދު ދެބަސްވުންތަކެއް ހިނގައި މައްސަލަ ބޮޑުވެއްޖެ އެވެ.

ފީފާ ކޮންފަޑެރޭޝަން ކަޕްގެ ބަދަލުގައި ކްލަބްތަކަށް ކޮންމެ ހަތަރު އަހަރުން އެއް އަހަރަކު ބާއްވާ މުބާރާތެއް ގޮތަށް ކްލަބް ވޯލްޑް ކަޕް ފޯމެޓް ރޭވީ 24 ޓީމު ކުޅޭގޮތަށް 2021 ގައި ޗައިނާގައި ފުރަތަމަ މުބާރާތް ބާއްވާށެވެ. އެކަމަކު، އޭރު ކޮވިޑް-19ގެ ދުވަސްވަރު ކަމަށްވާތީ ފީފާ އަށް ޖެހުނީ މުބާރާތް ފަސްކުރާށެވެ.

މިހާރު، އެ މުބާރާތް އޮތީ އަންނަ އަހަރު އެމެރިކާގައި ޖޫން/ޖުލައި ގައި ބާއްވަން ތާވަލުކޮށްފަ އެވެ. ބޮޑު ބަދަލަކާ އެކު، 32 ޓީމު ވާދަކުރާ ގޮތަށެވެ.

ޔޫރަޕިއަން ލީގްސް (33 ގައުމުން 39 ލީގު ތަމްސީލުކުރާ ޖަމިއްޔާ) އިން ވަނީ ކުޅުންތެރިންގެ ޖަމިއްޔާއެއް ކަމަށްވާ، ފިފްޕްރޯއާ އެކު ބައްދަލުވުމެއް ބާއްވައި، އަންނަ އަހަރު ފަށަން އުޅޭ ކްލަބް ވޯލްޑް ކަޕަކީ، ކުޅުންތެރިންގެ ސިއްހަތާއި އެެހެނިހެން ކަންކަމަށް ބެލުމެއް ނެތި ރާވާފައިވާ މުބާރާތެއް ކަމަށް ބުނެފަ އެވެ.

މިދިޔަ މެއި، މަހު ވޯލްޑް ލީގް އެސޯސިއޭޝަން، (46 ލީގު ތަމްސީލްކުރާ ޖަމިއްޔާ) އިން ވަނީ، ފީފާ އިން އެއްވެސް ވަރަކަށް އެކި ޖަމާއަތްތަކާ މަޝްވަރާ ކުރުމެއްނެތި، އަމިއްލަ މަންފާތަކެއް ހޯދަން، އަންނަ އަހަރު ފީފާ އިން ކްލަބް ވޯލްޑް ކަޕެއް ބާއްވަން އުޅޭ ކަމަށް ބުނެފަ އެވެ. އަދި އެ ކަމާ ދެކޮޅަށް ގާނޫނީ ފިޔަވަޅު އަޅަން ތައްޔާރުވަމުން އަންނަ ކަމަށް ވެސް ވޯލްޑް ލީގު އެސޯސިއޭޝަނުން ބުނެފައިވެ އެވެ.

ޖަމިއްޔާތަކުން، އާ ފޯމެޓާ މެދު ހިތްހަމަނުޖެހެނީ ކުޅުންތެރިން ބްރޭކެއް ނުލިބި އިންތިހާ އަށް މެޗު ކުޅެމުންދާތީ، ކުޅުންތެރިންގެ ސިއްހަތާއި ފުޓްބޯޅަ މެޗުތަކުގެ ފެންވަރަށް އަސަރުކުރަމުންދާތީވެ އެވެ.

ފީފާގެ ތަރުޖަމާނު މީޑިއާ އަށް ދިން އިންޓަވިއުއެއްގައި ބުނީ، މެއި މަހު 10 ވަނަ ދުވަހު ވޯލްޑް ލީގު އެސޯސިއޭޝަނާއި ފިފްޕްރޯއާ އެކު، ފީފާގެ ކަލަންޑަރާ މެދު މަޝްވަރާކުރަން ފޮނުވި ސިޓީ އަށް ޖަވާބެއް އަދިވެސް ލިބިފައިނުވާ ކަމަށެވެ.