ގައުމީ ލެވަލްގެ ފެންވަރު ރަނގަޅު ގިނަ ފުޓްބޯޅަ ކުޅުންތެރިންތަކެއް އުފެއްދުމުގެ ވިސްނުމުގައި، މީގެ އަށް މަސް ކުރިން ވުޖޫދުވި އެސްޕަޔާ ފުޓްބޯލް އެކެޑަމީން ކޯޗިން ޓީމު ވަރުގަދަ ކުރުމަށް އިތުރު، ކޯޗުން ހަމަޖައްސައި، އެކަޑަމީގެ މަސައްކަތް މިހާރަށް ވުރެ ވަރުގަދަކުރަން ނިންމައިފި އެވެ.

މިދިޔަ އަހަރުގެ ޑިސެމްބަރު މަހު، ފެށި އެސްޕަޔާ އެކެޑަމީން ދާދި ފަހުން ވަނީ ރާއްޖޭގެ އެންމެ ކާމިޔާބު ޔޫތު ފުޓްބޯޅަ ޓީމު، ކްލަބް އީގަލްސްގެ ޔޫތު ލެވަލްގެ ކަންކަމާ ހަވާލުވެފަ އެވެ. އަދި މަޖީދިއްޔާ ސްކޫލްގެ ޔޫތު ޓީމުތަކުގެ ސެޓަޕް ހަދައިދިނުމުގައި، އެސްޕަޔާ ވަނީ އެހީތެރިކަން ފޯރުކޮށްދީފަ އެވެ.

އެކެޑަމީގެ މި މުހިންމު، ޕްރޮޖެކްޓްތައް، އެސްޕަޔާ އެކެޑަމީ އިން ގެންދަނީ ރާއްޖޭގެ ލެވަލްގެ ތަޖުރިބާ ބޮޑު ކޯޗުންނާ އެކު އެވެ.

ދާދި ފަހުން، އެސްޕަޔާ އިން ވަނީ، އެ އެކެޑަމީ އަށް އާ ކޯޗުން ހަމަޖައްސައި، އެކެޑަމީގެ ޕްރޮގްރާމްތައް ކުރިއަށް ވުރެން ފުޅާކުރަން ނިންމައިފަ އެވެ.

އެސްޕަޔާ އަށް އާ ކޯޗުން ހަމަޖައްސަން ބޭއްވި އިވެންޓްގެ ތެރެއިން.--- ފޮޓޯ: އަތޫފް އާތިފް / އަދަދު

އެ ގޮތުން، އެސްޕަޔާއާ ގުޅުނު ކޯޗުންނަކީ، ގައުމީ ޓީމަށް ކުޅެފައިވާ، އަހުމަދު އަބްދުﷲ (ލިލީ) އާއި މުހައްމަދު ޝަފީއު (ޗެކް)، 19 އަހަރުން ދަށުގެ ގައުމީ ޓީމުގެ ކުރީގެ ކެޕްޓަން އަދި ޓީސީ ސްޕޯޓްސް ކްލަބްގެ ކުޅުންތެރިޔާ، މުހައްމަދު ޔަޒްދާން (ޔަޒޭ)، އީގަލްސްގެ އެސިސްޓަންޓް ކޯޗު، މުހައްމަދު ނަދީމް (ނަޑޭ)، ފުރަތަމަ ޑިވިޝަންގެ ގިނަ ޓީމުތަކަށް ކުޅެ، ފުޓްސަލްގައި ކާމިޔާބު ކޯޗިން ކެރިއަރެއް ބިނާކުރަމުން އަންނަ، މުހައްމަދު ފުހައިދު (ޓޯޑް) އެވެ.

އެސްޕަޔާގެ ކޯޗިން ޓީމުގައި ދެން މަސައްކަތް ކުރަމުން އަންނަ ކޯޗުންނަށް ބަލާއިރު، ފުޓްސަލް އާއި ފުޓްބޯޅަ ކޯޗިންގައި މަސައްކަތްކުރާ ގައުމީ ޓީމުގެ ކުރީގެ ކުޅުންތެރިޔާ، އަހުމަދު ނިޔާޒް (ނިޔާ)، 19 އަހަރުން ދަށުގެ ގައުމީ ޓީމުގެ އެސިސްޓަންޓް ކޯޗު، އަހުމަދު ފައްރާހު (ފައްރަ)، ގައުމީ އަންހެން ޓީމުގެ ހައްވާ ހަނީފާ އާއި ޝިޔާނާ އަހުމަދު ޒުހައިދު (ތާތި) އަދި ފުޓްބޯޅަ ކޯޗިންގައި މަސައްކަތްތަކެއް ކުރަމުން އަންނަ، ޖައުފަރު އަލީ (ޖައުބެ) ހިމެނެ އެވެ.

އެސްޕަޔާގެ ޕްލޭން ހެދުމުގައި މަސައްކަތް ކުރަނީ، ޓެކްނިކަލް ޑިރެކްޓަރެއްގެ ރޯލުގައި ހުރި ޕްރޯ ލައިސަންސް ކޯޗު މުހައްމަދު ޝިޔާޒް (މޯހަން) އާއި އެފްއޭއެމްގެ ކުރީގެ ޖެނެރަލް ސެކްރެޓަރީ، ހުސެއިން ޖަވާޒް (ޖަވާ) އެވެ. އެ ގޮތުން، އެކެޑަމީގެ ޓެކްނިކަލް އަދި އެޑްމިނިސްޓްރޭޓިވް ކަންކަން، ރަނގަޅަށް ހިންގުމުގައި، ޖަވާ އާއި މޯހަން ހަރަކާތްތެރިވުމަކީ، އެ އެކެޑަމީ އަށް ލިބޭ ބޮޑު ކުރިއެރުމެކެވެ.

އެސްޕަޔާ ފުޓްބޯލް އެެކެޑަމީގެ މީޑިއާ ޕާޓްނަަރަކީ، "އަދަދު ސްޕޯޓްސް" އެވެ.