ބީނޯޒް އެރީޒް، އާޖެންޓީނާ (އޮގަސްޓް 1) - ދާދި ފަހުން އާޖެންޓީނާ ގައުމީ ޓީމަށް ކުޅުން ހުއްޓާލި ތަޖުރިބާކާރު، މިޑްފީލްޑަރު، އަންހެލް ޑި މާރިއާ، އޭނާ އެންމެ ފުރަަތަމަ ކުޅުނު ރޮސާރިއޯ ސެންޓްރަލް އަށް ދާން އުޅުމުން، ލިބުނު މަރުގެ އިންޒާރުތަކާ ހެދި އެ ޓްރާންސްފާގެ ކަންކަން ކުރިއަށް ނުގެންދަން ނިންމައިފި އެވެ.

އުމުރުން 36 އަހަރުގެ ޑި މާރިއާ، މިދިޔަ ސީޒަނަށް ފަހު، ޕޯޗުގަލްގެ ބެންފީކާ ދޫކޮށްލީ އެ ކްލަބާ އެކު ހަދާފައިވާ ކޮންޓްރެކްޓް ހަމަވުމުންނެވެ. މިއީ، ޑި މާރިއާގެ ކެރިއަރުގައި، އޭނާ ބެންފީކާ އަށް ކުޅުނު ދެ ވަނަ ފަަހަރެވެ.

އެންމެ ފުރަތަމަ ބެންފީކާ އަށް 2007 ވަނަ އަހަރު ބަދަލުވުމުގެ ކުރިން ޑި މާރިއާ ވަނީ ދެ އަހަރު ރޮސާރިއޯ ސެންޓްރަލް އަށް ކުޅެފަ އެވެ. އެއީ، 2005 އިން 2007 އަށެވެ. ކެރިއަރުގެ ބާކީ ބައިގައި، އަލުން ރޮސާރިއޯ ސެންޓްރަލް އަށް ކުޅެން ޑި މާރިއާ ހުރީ ތައްޔާރަށެވެ.

އެކަމަކު، ދެން ކަންކަން ބަދަލުވެގެން ދިޔައީ އޭނާ ހީވެސް ނުކުރާ ކަހަލަ ގޮތަކަށެވެ.

"އަހަރެންގެ ދައްތަގެ ވިޔަފާރި ކުރާ ތަނުގައި، އޫރެއްގެ ބޮލެއް ލާފައި ހުރި ފޮށިގަނޑެއް ހުރި، އެ އޫރުގެ ބޮލުގައި ވަޒަނެއް ޖަހާފައި ހުރީ. ދެން، އެ ފޮށިގަނޑުގައި އޮތް ނޯޓުކޮޅެއް، އޭގެ ލިޔެފައި އޮތީ، އަހަރެން އެނބުރި އެ ކްލަބަށް (ރޮސާރިއޯ އަށް) އައިސްފިނަމަ، ދެން އެހެން އަންނާނީ އަހަރެންގެ އަންހެން ދަރިފުޅު ޕިއާގެ ބޯ ކަމަށް،" ރޮސާރިއޯގެ ޓެލެވިޝަން ސްޓޭޝަނަށް ދިން އިންޓަވިއުއެއްގައި، ޑި މާރިއާ ބުންޏެވެ.

"ވަރަށް އުނދަގޫ ވަގުތުތަކެއް މިއީ، ކޮންމެ ރެޔަކު ރޯކަށެއް ނުހުރެވޭނެ އަމިއްލަ ކްލަބަކަށް އެނބުރި އަންނަން ބޭނުންވެގެނޭ ކިޔާފައެއް،"

ބެންފީކާގައި ތިން އަހަރު ހޭދަކުރުމަށް ފަހު، ޑި މާރިއާ ވަނީ 2010 ވަނަ އަހަރު ރެއާލް މެޑްރިޑަށް ސޮއިކޮށްފަ އެވެ. އޭގެ ފަހުން، އޭނާ ދެން ގުޅުނީ، 2014 ވަނަ އަހަރު، މެންޗެސްޓާ ޔުނައިޓެޑާ އެވެ. އެ ކްލަބްގައި އެއް ސީޒަނުގައި ހޭދަކުުރި ޑި މާރިއާ ދެން ބަދަލުވީ، ޕީއެސްޖީ އަށެވެ. ޕީއެސްޖީ އަށް ހަތް ސީޒަން ކުޅެދިނުމަށް ފަހު، ޔުވެންޓަސް އަށް އެއް އަހަރު ކުޅުނެވެ. ދެން، ގުޅުނީ މިދިޔަ ސީޒަނުގައި ފެނިގެންދިޔަ ކުރީގެ ޓީމު ބެންފީކާ އިންނެވެ.