ފެނާއި ނަރުދަމާ އާއި ކަރަންޓުގެ ހިދުމަތްދޭ ކުންފުނިތައް (ޔޫޓިލިޓީ ކުންފުނިތައް) ހިނގާ ނުހިނގާ ގޮތް ބައްލަވައި އިރުޝާދު ދެއްވަމުން ގެންދަވާ ކަމަށާއި އެ ކުންފުނިތަކުގެ ހިންގުން ދެން ރަނގަޅުވާނެ ކަމަށް އެންވަޔަރްމެންޓް މިިނިސްޓަރު ތޯރިގު އިބްރާހީމް މިއަދު ވިދާޅުވެެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން ތޯރިގު ވިދާޅުވީ އެންވަޔަރަމެންޓު އެންޑް އެެނާޖީ ދާއިރާގެ ކުންފުނިތައް ކަމަށްވާ ސްޓެލްކޯ، އެމްޑަބްލިއުއެސްސީ، ފެނަކަ އަދި ވެމްކޯގެ މަސައްކަތްތައް ދުވަހުން ދުވަހަށް ބައްލަވަމުން ގެންދަވާ ކަމަށެވެ. އަދި އެ ކުންފުނިތަކަށް ދޭން ޖެހޭ އިރުޝާދުތައް ގަވައިދުން ދެމުންދާ ކަމަށް ވެސް އޭނާ ވިދާޅުވި އެވެ.

"މިހާރު އަޅުގަނޑު މި ދަނީ އެ ބޭފުޅުންނާ އެކު ހަމަ ރެގިއުލާކޮށް މަސައްކަތްކުރަމުން، ބަލަމުން، އެ ބޭފުޅުންނަަށް ޑައިރެކްޝަން ދެމުން، އިރާދަކުރެއްވިއްޔާ ކުރިއަށް އޮތް ތަނުގައި މި ކުންފުނިތައް ވަރަށް ރަނގަޅަށް ޕާފޯމްކޮށް، ރައްޔިތުންނަށް ބޭނުންވާ ބޭނުންތައް، އެ ކުންފުނިތަކުން ކޮށްދޭން ޖެހޭ ކަންތައްތައް ކޮށްދެވިގެންދާނެ،" ތޯރިގު ވިދާޅުވި އެވެ.

މިނިސްޓަރު ވިދާޅުވީ ޔޫޓިލިޓީ ކުންފުނިތަކަށް ސަރުކާރުގެ ކަމާ ބެހޭ ވުޒާރާތަކުން ދޭން ޖެހޭ އިރުޝާދުތައް ދީ، ހިނގާ ނުހިނގާ ގޮތް ކުރިން ވެސް ބެލި ނަމަ އެ ކުންފުނިތަކުގެ ހާލަތު ރަނގަޅުވީސް ކަމަށެވެ. ކުންފުނިތަކުގެ ވެރިން ޒިންމާދާރުކޮށް މަސައްކަތްކުރައްވާ ތޯ ބެލުމަކީ އެ ސެކްޓާއެއްގެ މިނިސްޓަރުގެ ޒިންމާއެއް ކަމަށް ވެސް އޭނާ ވިދާޅުވި އެވެ.

"އަޅުގަނޑަކަށް ނޭނގޭ ކުރީގެ މިނިސްޓަރު ނުވަތަ ކުރީގެ ސަރުކާރުން އެކަންތައްތައް ކުރެއްވި ގޮތެއް. އަޅުގަނޑު ގަބޫލުކުރާ ގޮތުގައި ތަންކޮޅެއް ގާތުން، ސަރުކާރުން، ސަރުކާރުން ހިންގާ ކުންފުނިތައް ބަލައިގެން އެ ބޭފުޅުންނަށް އެހީތެރިކަމެއް، ޑައިރެކްޝަނެއް ދެވުނު ކަމަށް ވާ ނަމަ، މިއަދު އެ ކުންފުނިތައް ވެސް އެ ހާލަތަކު ނޯންނާނޭ އަޅުގަނޑު ދަންނަވާނީ،" ތޯރިގު ވިދާޅުވި އެވެ.

މަޖިލީހުގައި ގިނަ މެންބަރުން މިއަދު އޭނާއާ ސުވާލުކުރީ ކަރަންޓްގެ ހިދުމަތުގެ ފެންވަރު ރަނގަޅުކުރަން ފަށާފައި ހުރި އެކިއެކި މަޝްރޫއުތަކާ ބެހޭ ގޮތުންނެވެ. އެ ފަދަ ގިނަ މަޝްރޫއުތައް ހުއްޓިފައި ހުރީ މިނިސްޓަރު ވިދާޅުވި ގޮތުގައި އެ މަޝްރޫއުތައް ހިންގާ ފެނަކަ ކޯޕަރޭޝަނުގައި ފައިސާ ނެތިގެންނެވެ.