ކުދި އާބާދީގެ ރަށްރަށުގައި ސިއްހީ ހިދުމަތްތައް ރަނގަޅު ކުރުމަށް ބޮޑު ޕްރޮޖެކްޓެއް ފެށުމުގެ ގޮތުން ކުވެއިތު ފަންޑާ އެކު 150 މިލިއަން ރުފިޔާގެ ލޯނު އެގުރިމެންޓެއްގައި ދިވެހި ސަރުކާރުން ސޮއިކޮށްފި އެވެ.

ކުވެއިތު ފަންޑާއެކު ދިވެހި ސަރުކާރުން މިއަދު ސޮއިކުރި "ސްމޯލް އައިލެންޑްސް ހޮސްޕިޓަލް ޕްރޮޖެކްޓް" ގެ ލޯނު އެގުރިމަންޓްގައި ވަނީ ތިން މިލިއަން ކުވެއިތީ ދީނާރެވެ. އެއީ 150,569,316.60 ދިވެހި ރުފިޔާ އެވެ.

އެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރު ޑރ. މުހައްމަދު ޝަފީގެވެ. ކުވެއިތު ފަންޑުގެ ފަރާތުން ސޮއިކުރެއްވީ އެ ފަންޑުގެ އެކްޓިން ޑިރެކްޓަރު ޖެނެރަލް ވަލީދު އަލް ބަހަރެވެ.

ފިނޭންސުން ނެރުނު ނޫސް ބަޔާނެއްގައި ބުނި ގޮތުގައި މި މަޝްރޫއުގައި ހިމެނޭ މަސައްކަތަކީ ހޮސްޕިޓަލް އިމާރާތް ކުރުމުގެ މަސައްކަތާއި ހިދުމަތްތަކުގެ އިލެކްޓްރޯ-ޓެކްނިކަލް މަސައްކަތާއި، ސިއްހީ އާލާތްތަކާއި ފަރުނީޗަރު ފޯރުކޮށްދިނުމެވެ.

އޭގެ އިތުރުން ކުރެހުންތަކާއި ބީލަން ލިޔެކިޔުންތައް ތައްޔާރުކުރުމާއި، އިމާރާތަށް ބޭނުންވާ އިންޖީނިއަރިން ހިދުމަތްތައް ވެސް ފޯރުކޮށްދޭނެ ކަމަށް އެ މިނިސްޓްރީން ބުންޏެވެ.

ސަރުކާރުން ބުނި ގޮތުގައި މި މަޝްރޫއުގެ ސަބަބުން ސިއްހީ ހިދުމަތަށް ދިވެހިން ދަތުރުފަތުރުކުރުމަށް ކުރާ ހަރަދުތައް ކުޑަވެ، ރަށްރަށުގެ އާބާދީގެ އިތުރަށް ރަށްރަށަށް ޒިޔާރަތްކުރާ ފަތުރުވެރިންނަށް ސިއްހީ ހިދުމަތް އެ ރަށުން ދެވޭ ގޮތަށް ހަމަޖެހޭނެ އެވެ. ސަރުކާރުން ބުންޏެވެ.

މިއާ އެކީ އެ ރަށްރަށުން ސެކަންޑަރީ ލެވެލްގެ ސިއްހީ ހިދުމަތް ލިބޭނެ ކަމަށް ވެސް ސަރުކާރުން ބުންޏެވެ.