ނައިބު ރައީސްގެ ރަސްމީ ގެކޮޅު، ހިލާލީގެއަށް މިހާރުގެ ނައިބު ރައީސް ހުސެއިން މުހައްމަދު ލަތީފު ބަދަލުވެވަޑައިގަންނަވާތީ، އެތަން މަރާމާތުކުރަން ދައުލަތުގެ ބަޖެޓުން 5.5 މިލިއަން ރުފިޔާ ހަރަދުކުރި ކަމަށް ރައީސް އޮފީހުން ބުނެފި އެވެ.
ރައީސް އޮފީހުން މިކަން ހާމަކުރީ މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން އެ މަރާމާތައް ދިޔަ ނުވަތަ ދާނެ ކަމަށް ލަފާކުރާ ހަރަދު ހޯދަން "އަދަދު" އިން އެ އޮފީހަށް ހުށަހެޅުމުންނެވެ.
މަރާމާތަށް ހިނގި ހަރަދު ހޯދަން މި ނޫހުން ރައީސް އޮފީހުގައި އެދުނީ ޑިސެމްބަރު 17، 2023 ގަ އެވެ. ރައީސް އޮފީހުން އެ އާރުޓީއައިއަށް ޖަވާބު ދިނީ އޭގެ ހަތް މަސް ފަހުން އިއްޔެ އެވެ.
ރައީސް އޮފީހުގެ ޖަވާބުގައި ވަނީ މި އަހަރު ޖެނުއަރީ 1، އިން ފެށިގެން ހިލާލީގޭގެ މަރާމާތަށް ހިނގި ހަރަދުގެ ޖުމްލަ އެވެ. މިކަމަށް މިހާތަނަށް 5،486،248ރ. ހަރަދުވެފައިވާއިރު، ރައީސް އޮފީހުން ބުނީ މި މަސައްކަތް ކުރަމުންދަނީ އެސްޓީއޯއިން ކަމަށެވެ.
ހަރަދުވީ ފައިސާގެ އަދަދާއެކީ ރައީސް އޮފީހުން ވަނީ ވަކި ވަކި ބިލުތަކަށް އެރި އަދަދުތައް ވެސް ހިއްސާކޮށްފަ އެވެ. ނަމަވެސް އެ ބިލުތަކުގައި ހަރަދުކުރި ކަންކަމުގައި ތަފުސީލު ހިމަނާފައިވާ ނުވާތީ، ހިލާލީގެއަށް ނައިބު ރައީސް ބަދަލުވެވަޑައިގަންނަވާތީ ކުރީ ކޮން ކަހަލަ މަރާމާތެއް ކަމެއް ސާފެއް ނޫނެވެ.
ނައިބު ރައީސް ހުސެއިން މުހައްމަދު ލަތީފު ހިލާލީ ގެއަށް ބަދަލުވެވަޑައިގެންނެވީ، ރައީސް ޑރ. މުހައްމަދު މުއިއްޒުގެ ސަރުކާރަށް ހަތަރު މަސްވި ފަހުން އެޕްރީލް 4، 2024 ގަ އެވެ. އެމަނިކުފާނުގެ ރަސްމީ ގެކޮޅަށް ބަދަލުވެވަޑައިގަތުން އެހާ ލަސްވީ، މަރާމާތުގެ މަސައްކަތްތަކާ ގުޅިގެން ކަމަށް އޭރު ރައީސް އޮފީހުން މީޑިއާތަކަށް ބުނެފައިވެ އެވެ.
ނައިބު ރައީސްގެ ގެކޮޅުގެ އިތުރުން، ރައީސްގެ ރަސްމީ ގެކޮޅު، މުލިއާގެއަށް ރައީސް މުއިއްޒު ބަދަލުވެވަޑައިގަންނަވާތީ އެތަން ވެސް މަރާމާތުކުރި އެވެ. މިކަމަށް ހިނގި ހަރަދު ހިއްސާކުރަން ރައީސް އޮފީހުގައި މި ނޫހުން އެދިފައިވީ ނަމަވެސް، މިއަދާ ހަމައަށް އެ މައުލޫމާތު ނުލިބެ އެވެ.
