ދިވެހި ސިވިލް ސާވިސްގެ ގަވާއިދަށް އިސްލާހު ގެނައުމަށް އާންމުންގެ ހިޔާލު ހޯދަން ސިވިލް ސާވިސް ކޮމިޝަނުން މިއަދު ހުޅުވާލައިފި އެވެ.

އެ ކޮމިޝަނުން ނެރުނު އިއުލާނުގައި ވަނީ ސިވިލް ސާވިސްގެ އަމާޒަކީ ދައުލަތުން ރައްޔިތުންނަށް ފޯރުކޮށްދެމުންދާ ހިދުމަތުގެ ފެންވަރު ރަނގަޅުކޮށް އަދި އަވަސްކަމާއެކު ޒަމާނީ ޓެކްނޮލޮޖީގެ ޒަރީއާއިން ރައްޔިތުންނަށް ފޯރުކޮށްދިނުން ކަމަށެވެ.

އަދި ކޮމިޝަނުން އަބަދުވެސް މަސައްކަތް ކުރާނީ މުވައްޒަފުންގެ ހައްގުތައް ކަށަވަރުކޮށްދީ، އިދާރާތައް ހިންގުމަށް ފަސޭހަ ގޮތްތައް ހޯދައި އަދި މުވައްޒަފުންގެ ކަންކަން ރަނގަޅަށް ބެލެހެއްޓޭނެ ނިޒާމެއް ގާއިމުކުރުމަށް ކަމަށް ވެސް އެ އިއުލާނުގައިވެ އެވެ.

މި ލަނޑުދަނޑިތައް ހާސިލުކުރުމަށްޓަކައި އެ ކޮމިޝަނުގެ ގަވާއިދުތަކަށް އިސްލާހު ގެންނަންޖެހޭ ކަމަށާއި އަދި އެ މަސަައްކަތް ކުރަމުންދާ ކަމަށް އެ ކޮމިޝަނުން ބުނެ އެވެ. އެހެންކަމުން މިކަމަށް ބޭނުންވާ އާންމުންނާއި ސިވިލް ސާވިސް މުވައްޒަފުންގެ ހިޔާލާއި މަޝްވަރާ ބޭނުންވާތީ އެ ފުރުސަތަށް އެ ކޮމިޝަނުން ވަނީ ހުޅުވާލާފަ އެވެ.

އޮގަސްޓު 31, ގެ ކުރިން އީމެއިލް މެދުވެރިކޮށް ހިޔާލު ހުށަހެޅުމަށް ވަނީ ހުޅުވާލާފަ އެވެ. އެންމެފަހުން މި ގަވާއިދަށް އިސްލާހު ގެނައީ 2014 ގަ އެވެ. އެ ބަދަލުތައް ކޮމިޝަނުގެ ވެބްސައިޓުން ފެންނަން ހުންނާނެ އެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" ނޫހުން އެދިގެން ސިވިލް ސާވިސް ކޮމިޝަނުން ހިއްސާކުރި މައުލޫމާތުތަކުން އެނގޭ ގޮތުގައި މެއި 2024 ގެ ނިޔަލަށް އެ ސާވިސްގައި 30,287 މީހުން ދަނީ މަސައްކަތް ކުރަމުންނެވެ. އޭގެ ތެރެއިން 67.5 އިންސައްތައަކީ އަންހެން މުވައްޒަފުން ކަމަށްވާއިރު ބާކީ 32.5 އިންސައްތައަކީ ފިރިހެން މުވައްޒަފުންނެވެ.