ގދ. ވާދޫ އާ އިންޖީނުގެ އަޅަން ކުރީގެ ސަރުކާރުން ފެށި މަޝްރޫއު ހުއްޓި، އެ މަޝްރޫއުގެ މަސައްކަތަށް އެ ރަށަށް ގެންގޮސް ބަހައްޓާފައި ހުރި މުދާތައް މި ސަރުކާރުން އެހެން ރަށްރަށުގެ މަސައްކަތަށް ގެންދާތީވެ، އެ ކަން ކުށްވެރިކޮށް އެ ރަށު ކައުންސިލްގެ ހަތަރު މެންބަރަކު ސޮއިކުރައްވައި ބަޔާނެއް ނެރެފި އެވެ.

ވާދޫ ކައުންސިލުން ނެރެފައިވާ ބަޔާނުގައި ބުނާ ގޮތުން މި ސަރުކާރު އައި އިރު އެ މަޝްރޫއުގެ 80 ޕަސެންޓު މަސައްކަތް ވަނީ ނިމިފަ އެވެ. އަދި އޭރުގައި ފެނަކައިން މައުލޫމާތު ދިން ގޮތުގައި އެ މަސައްކަތަކީ ދެން އިތުރު ހަތަރު މަސް ދުވަހުން ނިންމޭނެ މަޝްރޫއެއް ކަމަށް ބަޔާނުގައި ބުނެފައިވެ އެވެ.

ނަމަވެސް, މި ސަރުކާރުގެ އަށް މަސް ދުވަހުގެ ތެރޭގައި މަޝްރޫއުގެ އެއްވެސް މަސައްކަތެއް ނުހިނގައި، މަޝްރޫއަށް ރަށަށް ގެނެސްފައި ހުރި ގިނަ މުދާތައް ވެސް ރަށުން ގެންގޮސްފައިވާ ކަމަށް ކައުންސިލްގެ ބަޔާނުގައި ބުނެފައިވެ އެވެ.

ގދ. ވާދޫ އިންޖީނުގެ މަޝްރޫއު ހުއްޓިފައި - ފޮޓޯ: ވާދޫ ކައުންސިލް

ވާދޫ ކައުންސިލްގެ ރައީސް ހަސަން އަބްދުﷲ "އަދަދު" ނޫހަށް ވިދާޅުވީ ބަޔާނެއް މެދުވެރިކޮށް މުޅި ރާއްޖެއަށް އެ މައުލޫމާތުތައް ހާމަކުރަން ޖެހުނީ މަޝްވަރާ ކޮށްގެން އެއްވެސް ހައްލެއް ނުލިބިގެން ކަމަށެވެ. އަދި ބަޔާނުގައި ވެސް ތުހުމަތުކޮށްފައިވާ ފަދައިން އެ މުދާތައް ގެންދަނީ ސަރުކާރުގެ ނުފޫޒުގަދަ ބޭފުޅުންގެ ރަށްރަށަށް ކަމަށް އޭނާ ވެސް ތުހުމަތު ކުރެއްވި އެވެ.

"އެ ބަޔާނަކީ ހަގީގަތުގައި ވެސް އެ ކަން ހިނގާ ގޮތް، މަޝްރޫއު ހިންގާ ސައިޓު ވެސް ވަރަށް ބޮޑަށް ވީރާނާވެ ހަލާކުވާން ގާތްވެފައި ހުރީ، އަޅުގަނޑުމެން ވާދޫ ރައްޔިތުންގެ ޝަކުވާތައް އެ ބަޔާނުގައި ހުރީ،" ހަސަން ވިދާޅުވި އެވެ.