އެމެރިކާގެ ރިޕަބްލިކަން ޕާޓީގެ ކެންޑިޑޭޓް އަދި ކުރީގެ ރައީސް ޑޮނަލްޑް ޓްރަމްޕްއަށް ބަޑިން ހަމަލާދިން ތޯމަސް މެތިއު ކްރޫކްސް ރެލީ ސައިޓަށް، ހަމަލާގެ ގަޑިއިރުތަކެއް ކުރިން ޑްރޯންއެއް އެރުވިކަން ހާމަވެއްޖެ އެވެ.

ޖުލައި، 14 ވަނަ ދުވަހުގެ ރޭ ފަތިހު ކްރޫކްސް، 20 ރައިފަލްއެއް ބޭނުންކޮށްގެން ދިން އެ ހަމަލާ އަމާޒުވީ ޓްރަމްޕްގެ ކަންފަތަށެވެ. ނަމަވެސް އޭނާއަށް މާ ބޮޑު ޒަހަމްތަކެއް ނުވެ، ހޮސްޕިޓަލުގައި ފަރުވާ ދިނުމަށްފަހު ވަނީ ދޫކޮށްލާފަ އެވެ.

އެ ހަމަލާ ކްރޫކްސް ދިންތާ ސިކުންތުކޮޅެއް ތެރޭގައި ސީކްރެޓް ސާވިސްއިން ވަނީ ކްރޫކްސްގެ ގަޔަށް ބަޑިޖަހައި އޭނާ މަރާލައިފަ އެވެ. ޓްރަމްޕަށް އަމާޒުކޮށް ކްރޫކްސް ތިން ވަޒަން ފޮނުވައިލި އެވެ. އޭގެ ތެރެއިން ވަޒަނެއް އަރައި އެކަކު މަރުވެ، އެހެން މީހަކު ވަރަށް ބޮޑަށް ޒަހަމްވި އެވެ.

ސްކައި ނިއުސްއިން ބުނީ ހަމަލާދިނުމުގެ ގަޑިއިރުތަކެއް ކުރިން ޑީޖޭއައި ޑްރޯންއެއް މެދުވެރިކޮށް ހަމަލާދިން ސައިޓު ކްރޫކްސް ބަލާފައިވާ ކަމަށާއި ބެލެވޭ ގޮތުގައި އެއީ ހަމަލާ ރާވަން ކްރޫކްސް ކުރި ކަމެއް ކަމަށެވެ.

އެ ސައިޓު ޑްރޯން މެދުވެރިކޮށް ދުރުން ބެލުމަކީ ހަމަލާ ރާވަން ފަސޭހަވާނެ ކަމެކެވެ. ނަމަވެސް ކްރޫކްސް ޑްރޯން ބޭނުންކުރިކަން ހާމަވީ އޭނާގެ ފޯނުން ފެނުނު ރެކޯޑިން ތަކުންކަން މިހައިތަނަށް ކަށަވަރުވެފައެއް ނުވެ އެވެ.

ޑްރޯން މެދުވެރިކޮށް އާންމުކޮށް ނަގާ ފުޓޭޖުތައް ފޯނުގައި ސޭވްކުރެވެ އެވެ. އަދި ޑްރޯންގެ ހުރިހާ މޫވްމެންޓެއް ވެސް ފޯނުން އެނގެ އެވެ.

އެފްބީއައި އިން އަންނަނީ ޓްރަމްޕަށް ހަމަލާދިން މައްސަލަ ސީރިއަސް މައްސަލައެއް ގޮތުގައި ތަހުގީގު ކުރަމުންނެވެ. އަދި އޭނާގެ ގެއިން ފެނުނު ތަކެއްޗާއި ފޯނާޢި އަދި ކާރުން ފެނުނު ސާމާނުތައް ވަނީ ބެލެމުގެ ދަށަށް ގެންގޮސްފަ އެވެ.

ހަމަލާއާ ގުޅިގެން ސީކްރެޓް ސާވިސްއިން ބުނީ ކްރޫކްސް ހަމަލާދީފައިވާ ސަރަހައްދަކީ ފުލުހުންގެ ބެލުމުގެ ދަށުގައި އޮތް ސަރަހައްދެއް ކަމަށް ބުނެފަ އެވެ. ސީކްރެޓް ސާވިސްއަށް ހަމަލާއާ ގުޅިގެން ބޮޑެތި ފާޑުކިޔުން ވަނީ އަމާޒުވެފަ އެވެ.