ފްރާންސްގެ ޓޯޓަލްއެނާޖީސް ކުންފުނިން، ދުނިޔޭގެ އެންމެ ބޮޑު އެއް މަހުޖަނު، އިންޑިއާގެ ގޯތަމް އަދާނީގެ އަދާނީ ގްރޫޕަށް ކުރާ އިންވެސްޓްމަންޓްތައް ހުއްޓާލައިފި އެވެ.

ހޯމަ ދުވަހު އިއުލާނުކުރި މި ފިޔަވަޅަކީ، ގޯތަމް އަދާނީ އާއި އެ ކުންފުނީގެ އިތުރު ހަތް މީހެއްގެ މައްޗަށް، ރިޝްވަތު ބެހިކަމުގެ ތުހުމަތުގައި އެމެރިކާގައި ދައުވާ އުފުލި ފަހުން ކުރިމަތިވި މިފަދަ ފުރަތަމަ ގެއްލުމެވެ.

އެ ދައުވާގައި އެމެރިކާގެ ޕްރޮސިކިއުޓަރުންގެ ތުހުމަތުކޮށްފައި ވަނީ އިޔާދަކުރަނިވި ހަކަތައިގެ ޕްރޮޖެކްޓުތައް ހޯދަން އަދާނީ ގްރޫޕުން އިންޑިއާ ސަަރުކާރުގެ އެކި އޮފިޝަލުންނަށް 250 މިލިއަން ޑޮލަރު ރިޝްވަތުގެ ގޮތުގައި ބަހާފައިވާ ކަމާއި ކުންފުނިތަކަށް އިންވެސްޓުކުރި އެމެރިކާގެ ބޭންކުތަކާއި އެހެނިހެން އިންވެސްޓަރުންނަށް އެކަން ސިއްރުކޮށްފައިވާ ކަމަށެވެ.

މި ތުހުމަތުތައް އަދާނީ ގްރޫޕުން ދޮގުކުރެ އެވެ.

ޓޯޓަލްއެނާޖީސްއިން އަދާނީ ގްރޫޕަށް ކުރާ އިންވެސްޓްމެންޓު ހަތަރު ބިލިއަން ޑޮލަރާއި ފަސް ބިލިއަން ޑޮލަރަށް އަރާ ކަމަށް ބާންސްޓައިން ރިސާޗް ލަފާކުރެ އެވެ.

ނަމަވެސް ރިޝްވަތުގެ ތުހުމަތުތަކާ ގުޅިގެން އިތުރަށް އިންވެސްޓު ނުކުރަން އެ ކުންފުނިން ވަނީ ނިންމައިފަ އެވެ.

އަދާނީގެ މައްޗަށް ދައުވާ އުފުލުމާއެކު، ކެންޔާގެ މައި އެއާޕޯޓްގެ އަދާނީ ގްރޫޕަށް ދޭނެ ކަމަށް ބެލެވުނު ބީލަން ވަނީ ބާތިލްކޮށްފަ އެވެ.