މެޑްރިޑް (ޖުލައި 16) - ކްރިސްޓިއާނޯ ރޮނާލްޑޯ ރެއާލުގެ ކުޅުންތެރިއެއްގެ ގޮތުގައި ދައްކާލި ދުވަހު ހެދި ރެކޯޑް މުގުރާލުމަށް ފަހު, ފްރާންސްގެ ތަރި ކީލިއަން އެމްބާޕޭ ރެއާލް މެޑްރިޑް ކުޅުންތެރިއެއްގެ ގޮތުގައި ދައްކާލައިފި އެވެ.

ރޮނާލްޑޯ ރެއާލްގެ ކުޅުންތެރިއެއްގެ ގޮތުގައި ތައާރަފްކުރީ 79,800 މީހުންގެ ކުރިމަތީގަ އެވެ. އެކަމަކު، ރެއާލްގެ ޖާޒީގައި އެމްބާޕޭގެ ޕްރެޒެންޓޭޝަން މިއަދު އޮތީ، ރެއާލްގެ ދަނޑު ސަންޓިއާގޯ ބާނަބައުގައި ބޭއްވި ހާއްސަ އިވެންޓެއްގައި 80,200 މީހުންގެ ކުރިމަތީގަ އެވެ.

ރެއާލާ އެކު އެމްބާޕޭ ހަދާފައިވަނީ ފަސް އަހަރުގެ ކޮންޓްރެކްޓެކެވެ. ޔޫރޯގެ ކުރިން އެމްބާޕޭ ވަނީ އޭނާގެ ސޯޝަލް މީޑިއާގައި ރެއާލަށް ބަދަލުވާން ނިންމާފައިވާކަން ހިއްސާ ކޮށްފަ އެވެ.

އެމްބާޕޭ، 24، އޭނާގެ ސޯޝަލް މީޑިއާގައި ހިއްސާކުރި ޕޯސްޓެއްގައި ބުނީ, ކުޑައިރުން ފެށިގެން ހުވަފެނީ ކުލަބަކީ ރެއާލް މެޑްރިޑް ކަމަށާއި, އެ ކުލަބަށް ބަދަލުވުން އެއީ ބަޔާންކުރަން އުނދަގޫ ބޮޑު އުފަލެއް ކަމަށެވެ.

"އަހަރެންގެ ހުވަފެނީ ކުލަބަށް ބަދަލުވުން އެއީ ބޮޑު އުފަލެއް. މީހަކަށް ނޭނގޭނެ އަހަރެން މިވަގުތު މިވީ އުފަލެއް. ބާނެބެއު (ރެއާލްގެ ދަނޑު) ގައި ކުޅެން މިހުރީ ކެތް މަދުވެފައި." އެމްބާޕޭ ބުންޏެވެ.

ރެއާލްގެ ޖާޒީގައި ހުރެ، ސަޕޯޓަރުންނާ މުހާތަބުކޮށް ވާހަކަ ދައްކަމުން، އެމްބާޕޭ ބުނީ، ރެއާލަށް އައީ, ހުވަފެންތައް ހަގީގަތަކަށް ހަދާ އެ ކްލަބްގެ މުއްސަނދި ތާރީހުން ޖާގަ ހޯދަން ކަމަށެވެ. އަދި ރެއާލަކީ ދުނިޔޭގެ އެންމެ ބޮޑު ކުލަބް ކަމަށާއި, ކުލަބްގެ ތާރީހުގައި ނަން ފަވާލުން މިއީ މިހާރުގެ އަމާޒު ކަމަށް އެމްބާޕޭ ބުނެފައިވެ އެވެ.

"އަހަރެން އެތައް ރެޔަކު ނިދިން މި ހުވަފެނުގައި. މިއަދު މި ހުވަފެން ހަގީގަތަކަށް ވެއްޖެ. މިހާރު މިއީ ހަގީގަތް" އެމްބާޕޭ ބުންޏެވެ.

އެމްބާޕޭ ރެއާލަށް ބަދަލުވިކަން އިއުލާން ކުރުމާ އެކު އެ ކަމަށް ރެއާލްގެ ކުޅުންތެރިން ވަނީ މަރުހަބާ ކިޔައިފަ އެވެ. މީގެ އިތުރުން ރެއާލުގެ ލެޖެންޑުން ވެސް ވަނީ އެމްބާޕޭ އަށް މަރުހަބާ ކިޔައިފަ އެވެ.

ރެއާލްގެ ލެޖެންޑް އަދި އެ ޓީމަށް އެންމެ ގިނަ ލަނޑު ޖަހައިދިން ރޮނާލްޑޯ ވެސް ވަނީ އެމްބާޕޭ އަށް މަރުހަބާ ކިޔާފަ އެވެ. ރޮނާލްޑޯ ބުނީ އެމްބާޕޭގެ ކުޅުން ބަލާލަން ކެތްމަދުވެފައި ހުރި ކަމަށެވެ. އަދި ކާމިޔާބީ އަށް އެދޭކަމަށް ވަނީ ބުނެފަ އެވެ.

މިއަދު ބޭއްވި އެމްބާޕޭގެ މަރުހަބާ އިވެންޓްގައި، ރެއާލަށް ކުރިން ކުޅެ، އެ ޓީމަށް ކޯޗުކަން ވެސް ކޮށްދިން ތަރި ޒިނެދިން ޒިދާން ވެސް ބައިވެރިވި އެވެ.

ޕީއެސްޖީ އަށް ކުޅެދިން 306 މެޗުގައި އެމްބާޕޭ ވަނީ 256 ގޯލު ޖަހާ 96 ގޯލު ޖަހަން އެހީތެރިވެދީފަ އެވެ. އަދި ޕީއެސްޖީއާ އެކު ހަތް ފަހަރު ފްރެންޗް ލީގު ވަނީ ކާމިޔާބު ކޮށްފަ އެވެ. އެ ޓީމުގައި އޭނާ އެންމެ ބޭނުންވީ ޗެމްޕިއަންސް ލީގެއް ކާމިޔާބު ކުރާށެވެ. އެކަމަކު، އެކަން ހާސިލްނުވެ، އެމްބާޕޭ މި ސޮއިކުރި ރެއާލް އަކީ، ޗެމްޕިއަންސް ލީގު 15 ފަހަރު ކާމިޔާބުކޮށްފައިވާ، އެ މުބާރާތުގެ އެންމެ ކާމިޔާބު ޓީމެވެ.