މެޑްރިޑް (ޖެނުއަރީ 8) - މީގެ ހަތަރު ދުވަސް ކުރިން ސްޕެނިޝް ލީގުގައި ރެއާލް މެޑްރިޑުން ވެލެންސިއާ ބަލިކުރި މެޗުގައި ރެއާލްގެ ވިނީޝިއުސް އަށް ދެއްކި ރަތް ކާޑާ އެކު، އޭނާ އިތުރު ދެ މެޗަށް ސަސްޕެންޑްކުރަން ނިންމައިފި އެވެ.

ރެއާލުން އެއް ކުޅުންތެރިއަކު މަދުކޮށް ކުޅެ ވެލެންސިއާ އަތުން ފަހު ވަހުތު މޮޅުވި މެޗުގައި، ވިނީޝިއުސް އަށް ރަތް ކާޑު ދެއްކީ ދެ ވަނަ ހާފުގަ އެވެ. ވެލެންސިއާ މެޗުގެ 79 ވަނަ މިނިޓްގައި ވިނީޝިއުސް އަށް ރަތް ކާޑެއް ދެއްކީ ވެލެންސިއާގެ ކީޕަރު ސްޓޯލް ޑިމްޓްރިއޭވްސްކީގެ ކަރުގައި ހިފުމުންނެވެ. އަދި އެކަން ވީޑިއޯ އެސިސްޓަންޓް ރެފްރީ (ވީއޭއާރް) އިން ވަނީ ޔަގީންކޮށްފަ އެެވެ.

ލީގުގެ ޑިސިޕްލިނަރީ ބޯޑުން މި މައްސަލަ ބެލުމަށް ފަހު، ވިނީޝިއުސް އަށް ދެ މެޗުގެ ސަސްޕެންޝަނެއް ދިނުމުގެ އިތުރުން، އޭނާ އާއި ރެއާލް ވަނީ ޖޫރިމަނާކޮށްފަ އެވެ.

ދާދި ފަހުން ފީފާ ބެސްޓް އެވޯޑްސްގެ އެންމެ މޮޅު ކުޅުންތެރިޔާގެ މަގާމު ހޯދި ވިނީޝިއުސް އަށް މި ސަސްްޕެންޝަންގެ ސަބަބުން ގެއްލޭނީ ލީގުގެ ދެ މެޗެވެ. އެއީ، ލަސް ޕަލްމާސް އާއި ރެއާލް ވަލޮޑޮލިޑާ ދެކޮޅަށް ކުޅޭ މެޗެވެ.

ރެއާލުން ދެން އެންމެ އަވަހަށް ކުޅޭނީ ސްޕެނިޝް ސުޕަ ކަޕްގަ އެވެ. ސައުދީ އަރަބިއްޔާގެ ރިޔާދުގައި ކުރިއަށްދާ މި މުބާރާތުގެ ސެމީ ފައިނަލުގައި ބުރާސްފަތި ދުވަހުގެރޭ މަޔޯކާއާ ބައްދަލުކުރާނެ އެވެ.