ނޭޝަނަލް ކައުންޓާ ޓެރަރިޒަމް ސެންޓަރުން މީގެކުރިން އަމަލުކުރަމުން އައީ މުސްލިމުންނާ އަދާވާތްތެރި މިސްރާބަކަށް ކަމަށް ވާތީ އެކަން ބަދަލުކުރަން ކަމަށް ބުނެ ޖަމިއްޔަތު ސަލަފުން އެ ސެންޓަރާ އިއްޔެ ބައްދަލުކޮށްފި އެވެ.

ސަލަފުގެ އިސްވެރިންނާއި އެންސީޓީސީގެ ބައެއް ވެރިންނާ ބައްދަލުކުރިކަން އެ ސެންޓަރުގެ އޮފިޝަލް އެކްސް އެކައުންޓުން ވަނީ ހާމަކޮށްފަ އެވެ. މިއީ ޓެރަރިޒަމާ ދެކޮޅަށް ކުރަމުންދާ މަސައްކަތުގައި ދެ ފަރާތް ގުޅިގެން ކުރެވިދާނެ ކަންކަން ދެނެގަތުމަށް ބޭއްވި މަޝްވަރާ ބައްދަލުވުމެއް ކަމަށް އެންސީޓީސީން ބުނެ އެވެ.

ނަމަވެސް, ސަލަފުގެ ރައީސް އަބްދުالله ބިން މުހައްމަދު އިބްރާހިމް އެކްސްގައި ވިދާޅުވީ ބައްދަލުކުރީ އެންސީޓީސީން މީގެކުރިން އަމަލުކޮށްފައިވަނީ މުސްލިމުންގެ އަދާވާތްތެރިން ބޭނުންވާ ގޮތަށް ކަމުން އެކަން ބަދަލުކުރުމުގެ ނިޔަތުގައި ކަމަށެވެ.

"ފާއިތުވި ތަނުގައި ސެންޓަރުގެ މަސައްކަތް ފާހަގަވެފައިވަނީ، މުސްލިމުންނާ އަދާވާތްތެރި ފަރާތްތަކުގެ މިސްރާބާއި ރަހައަށް، އަދި އިސްލާމީ މުޖުތަމައެއްގައި ހުންނަން ޖެހޭ ވިސްނުމާއި މިންގަނޑަށް ނޫން ކަމުން، ކުރިއަށް އޮތް ތާނގައި އެކަންކަން ސީދާކޮށްގެން މެނުވީ އިސްލާމީ މުޖުތަމައުއެއްގައި އަމަންއަމާންކަން ނުހިފެހެއްޓޭނެ ކަމުގެ މައްޗަށް" އޭނާ ވިދާޅުވެފައިވެ އެވެ.

އޭނާ އެ ވިދާޅުވާ މުސްލިމުންނާ އަދާވާތްތެރި މިސްރާބާއި ރަހައަކީ ކޮން ކަންކަމެއްކަން ސާފުކޮށް ބުނެފައިނުވެ އެވެ.

ޖަމިއްޔާއެއްގެ ގޮތުގައި އޮވެ އަމަލުކުރާ ގޮތްތަކާ ގުޅިގެން ސަލަފު ޖަމިއްޔާއަށް ފާޑުކިޔުން އަމާޒުވެ އެވެ. ވަކިން ހާއްސަކޮށް ޖަމިއްޔާއެއްގެ ނިވަލުގައި ތިބެ ސިޔާސީ ހަރަކާތް ހިންގާ ކަމަށް ބުނެ ފާޑުކިޔުން ސަލަފަށް އަމާޒުވެ އެވެ.

2018 ގެ ރިޔާސީ އިންތިހާބުގައި ސަލަފުން އެންޑޯޒް ކުރީ އޭރުގެ ރައީސް އަދި ޕީޕީއެމްގެ ރިޔާާސީ ކެންޑިޑޭޓު އަބްދުالله ޔާމީނެވެ. އަދި މިދިޔަ އަހަރު އޮތް އިންތިހާބުގައި އެ ޖަމިއްޔާގެ ބައެއް އިސްވެރިންނާއި ހަރަކާތްތެރިން ރައީސް ޑރ. މުހައްމަދު މުއިއްޒު ވެސް އެންޑޯޒް ކުރެއްވި އެވެ.