މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ޗެއާމަން އަދި ޑިރެކްޓަރުންގެ ބޯޑުގެ މެންބަރަކަށް މަޓާޓޯގެ ރައީސް އަބްދުﷲ އިޔާސް ރިޔާޒް މިއަދު އައްޔަނުކޮށްފި އެވެ.

ޕްރަވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން "އެކްސް" ގައި ކުރި ޕޯސްޓެއްގައި އެމްއެމްޕީއާރްސީއަށް އިޔާސް އައްޔަނުކުރިކަން ވަނީ ކަށަވަރުކޮށްދީފަ އެވެ.

މަޓާޓޯގެ ރައީސްކަމަށް 2022 ގައި އައްޔަނުކުރި ގިޔާސް ވަނީ އޭގެ ކުރިން ވެސް އެ އެސޯސިއޭޝަނުގެ ރައީސްކަން ކޮށްފަ އެވެ. އަދި އޭނާ ވަނީ މަޓާޓޯގެ ނައިބުރައީސްކަން ވެސް ކުރިން ފުރުއްވާފަ އެވެ.

އެމްއެމްޕީއާރްސީއަށް އިޔާސް އައްޔަނުކޮށްފައި ވަނީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރު ކަމުން މުހައްމަދު ބައްސާމު އާދަމް އަދި ކުންފުނީގައި އެންމެ ގިނަ ދުވަސްވީ މުވައްޒަފު އިބްރާހިމް އާސިމް ވަކިކުރިތާ ހަފްތާއެއް ނުވަނީސް އެވެ.

ބައްސާމް އާއި އިބްރާހިމް އާސިމް ވަކިކުރި ސަބަބެއް އެ ކުންފުނިން އަދި ޕީސީބީން ބުނެފައެއް ނުވެ އެވެ. ނަމަވެސް ބައްސާމް ވިދާޅުވީ ކުންފުނިން ވަކިވީ ހަރަދު ކުޑަކުރުމަށް ރައީސް ޑރ. މުހައްމަދު މުއިއްޒު ކަނޑައަޅުއްވާފައިވާ ސިޔާސަތުގެ ތެރެއިން ކަމަށެވެ.

އެމްއެމްޕީއާރްސީގެ އެމްޑީ ކަމަށް މި ސަރުކާރުން ވެރިކަމަށް އައިސް އެންމެ ފުރަތަމަ އައްޔަނުކުރީ ފާތުމަތު ތައުފީގު އެވެ. ނަމަވެސް އެ މަގާމުން އޭނާ ވަކިކޮށް، އިބްރާހިމް ޝިއުރީ ވަނީ ފަހުން އައްޔަނުކޮށްފަ އެވެ.