ރާއްްޖޭގައި ހިންގާ އެންމެ ބޮޑު އަމިއްލަ ހޮސްޕިޓަލް ކަމަށްވާ, އޭޑީކޭ ހޮސްޕިޓަލުން އާސަންދަ އަދި އެންސްޕާއަށް ދީފައިވާ ހިދުމަތްތަކަށް ބިލުކޮށްފައިވާ 144 މިލިއަނަށް ވުރެ ގިނަ ރުފިޔާ ނުލިބިވާ ކަމަށް މިދިޔަ އަހަރު ފޮނުވާފައިވާ ސިޓީއާ ގުޅިގެން އެ ފައިސާ މިހާރު ލިބިފައިވޭތޯ ބަލަން ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމައިފި އެވެ.

އޭޑީކޭގެ ސިޓީ މާލިއްޔަތު ކޮމިޓީއަށް ފޮނުވާފައިވަނީ ނޮވެމްބަރު 2023, ގަ އެވެ. އެ ސިޓީގައި ބުނެފައި އޮތީ އޮކްޓޯބަރު 2023, ގެ ނިޔަލަށް އާސަންދަ އަދި އެންސްޕާއަށް ދީފައިވާ ހިދުމަތްތަކަށް 144,376,112ރ. ގެ ތެރެއިން 78,555,828ރ. އަކީ ފައިސާ ނުދޭތާ 90 ދުވަސް ވެފައިވާ ބިލުތަކެއް ކަމަށެވެ. އަދި, އެ ފައިސާ ހޯދައިދޭން އެ ސިޓީގައިއ އެދިފައި އޮތެވެ.

މި މައްސަލައާ ގުޅިގެން ވާހަކަ ދައްކަން ދިން ފުރުސަތުގައި ސަރުކާރުގެ މެންބަރުން ބުނަމުންދިޔައީ މިއީ "ކުރީ ސަރުކާރު"ގެ ސަބަބުން ދިމާވި ކަމެއް ކަމަށެވެ. އެ ސަރުކާރުން ކަންކަން ކުރީ ސިޔާސީ ކަމެއްގެ ގޮތުގައި ކަމަށް ޕީއެންސީގެ މެންބަރުން ވިދާޅުވި އެވެ.

މިއީ މިދިޔަ އަހަރުގެ ސިޓީއެއް ކަމަށާއި އެ ސިޓީގެ ކަންކަން ވެސް ބަލަމުންދަނީ ނުނިމި ހުރި ކަންކަން ބަލަން ކޮމިޓީން ފާސްކޮށްފައި އޮތުމުން ކަމަށް ރިޔާސަތުގައި އިންނެވި މާމިގިލީ ދާއިރާގެ މެންބަރު ގާސިމް އިބްރާހިމް ވިދާޅުވި އެވެ.

"މިހާރު އަނެއްކާ ނޭނގެ އޮތް ހާލަތެއް, ކިހާ ވަރެއް ނުދެނީ ދިނީ ވެސް. މިވެސް ސާފުކުރަން ޖެހޭ ކަމެއް. އެނގޭ ކޮންމެ މިކަހަލަ ހޮސްޕިޓަލަކަށް ދޭން ޖެހޭ ފައިސާ ހުންނާނެކަން. އެއީ ޔަގީން ކަމެއް. މާލީ ހާލަތު މިހާ ދަށުގައި އޮއްވައި މިކަހަލަ ކަންކަން އަންނާނެ," ކޮމިޓީގެ ނައިބު މުގައްރިރު އަދި އޭދަފުށީ ދާއިރާގެ މެންބަރު އަހްމަދު ސަލީމް ވިދާޅުވި އެވެ.

ކޮމިޓީން ނިންމީ މިހާރު އޮތް ހާލަތު ބެލުމަށް ސިޓީއެއް ފޮނުވައިގެން މައުލޫމާތު ސާފު ކުރުމަށެވެ.