ކާރިސާތައް މެނޭޖު ކުރުމަށް އެމަޖެންސީ އޮޕަރޭޝަން ކޯޑިނޭޝަން ސެންޓަރެއް ގާއިމު ކުރަން ވޯލްޑް ބޭންކާއި އިންޓަނޭޝަނަލް ޑިވެލޮޕްމަންޓް އެސޯސިއޭޝަން (އައިޑީއޭ) އިން ދޫކުރަން އޮތް ފަންޑުން 500،000 ޑޮލަރު (7.7 މިލިއަން ރުފިޔާ) ނުލިބޭ ގޮތްވި ކަން އޮޑިޓް ރިޕޯޓުން ދައްކައިފި އެވެ.

ދެހާސްނަވާރަވަނަ އަހަރު ސޮއިކުރި އެއްބަސްވުމުގެ ދަށުން އެމްއެމްއޭއަށް ދޫކޮށްފައިވާ އެ ފަންޑު ސަރުކާރަށް ދިނުން ލަސްވެފައިވަނީ އެއްބަސްވުމާ އެއް ގޮތަށް ސަރުކާރުން ހަމަޖައްސަން ޖެހޭ ބައެއް އިދާރީ ކަންކަން ހަމަނުޖައްސައިގެން ކަން، މިދިޔަ ހަފުތާ ނެރުނު އޮޑިޓް ރިޕޯޓުގައި ފާހަގަކޮށްފައިވެ އެވެ.

އޮޑިޓް ރިޕޯޓުގައި ފާހަގަކޮށްފައިވާ ގޮތުގައި ސެންޓަރު ގާއިމުކުރަން އިމާރާތެއް ވެސް ސަރުކާރުން ވަނީ ކަނޑައަޅައިފަ އެވެ. އެކަމަކު 2019 ވަނަ އަހަރުން ފެށިގެން އެ އިމާރާތުގެ މިލްކުވެރިކަމުގެ ރަޖިސްޓްރީ ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އަށް ބަދަލުކޮށްފައި ނެތް ކަން ބުނެފައިވެ އެވެ.

އޮޑިޓް ރިޕޯޓު ތައްޔާރުކުރި ތާރީހާ ހަމައަށް ވެސް އެ މަސައްކަތް ހިނގާފައި ނެތެވެ.

ރައީސް އޮފީހާއި ފިނޭންސް މިނިސްޓްރީއާއި، ޕްރޮޖެކްޓް ހިންގާ ހައުސިން މިނިސްޓްރީއާއި، ބިމުގެ މިލްކުވެރިކަން އޮތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާއި އެންޑީއެމްއޭއާ ދެމެދު އޭގެ މުއާމަލާތްތައް ހިނގަމުން ދިޔަ އިރު މަޑުޖެހިފައިވަނީ ފިނޭންސްގެ ނިންމުމަކަށް ކަން ބުނެފައިވެ އެވެ.

ނެޝަނަލް އިމަޖެންސީ އޮޕަރޭޝަން ކޯޑިނޭޝަން ސެންޓަރެއް ގާއިމްކުރަން ކުރީގެ ސަރުކާރުން ނިންމީ މާލޭގައި ހިނގި ބައެއް ކާރިސާތަކަށް ފަހު، ހާލުގައި ޖެހުނު މީހުންނަށް އެހީތެރިވުމުގައި ކުރިމަތިވި ދަތިތަކަށް ފަހުގަ އެވެ. މާލޭ އަބަދަށް ފެހި މަގުގައި ހިނގި އަލިފާނުގެ ހާދިސާ އޭގެ ތެރޭގައި ހިމެނެ އެވެ.