އިނގިރޭސިވިލާތުގައި ކޮންޒަވޭޓިވް ޕާޓީން ކުރަމުން އައި ވެރިކަން 14 އަހަރަށްފަހު ނިމުމަކަށް ގެނެސް، ލޭބާ ޕާޓީން އާންމު އިންތިހާބު ބޮޑު ތަފާތަކުން ކާމިޔާބުކޮށްފި އެވެ.

އިއްޔެ ބޭއްވި އެ އިންތިހާބުގައި ލޭބާ ޕާޓީން 409 ގޮނޑި ކާމިޔާބުކުރިއިރު، އެ ޕާޓީއާ އެންމެ ގާތުން ވާދަކުރި މިހާރު ވެރިކަމުގައި އޮތް ކޮންޒަވޭޓިވްއަށް ކާމިޔާބު ކުރެވުނީ 120 ގޮނޑި އެވެ. އަދި ލިބެރަލް ޕާޓީން ވަނީ 71 ގޮނޑި ކާމިޔާބުކޮށްފަ އެވެ.

މި ނަތީޖާއާއެކު ދެން އިނގިރޭސިވިލާތުގެ ބޮޑުވަޒީރުކަމާ ހަވާލުވެވަޑައިގަންނަވާނެ ލޭބާ ޕާޓީގެ ލީޑަރު ކެއިރް ސްޓާމަރް ވިދާޅުވީ އެ ޕާޓީން ބޭނުންވި ގޮތަށް އިންތިހާބު ބޮޑު ތަފާތަކުން ކާމިޔާބު ކުރުމުން އުފާވާ ކަމަށާއި މިއާއެކު ދެން ބަދަލުތަކެއް ގެނައުމުގެ މަސައްކަތް ފެށުނީ ކަމަށެވެ.

އިންތިހާބުގައި 650 ގޮނޑިއަށް މެންބަރުން އިންތިހާބުކުރި އެވެ. އޭގެ ތެރެއިން އެސްއެންޕީ، ސިން ފެއިން، ޑީޔޫޕީ، ގްރީން ޕާޓީން ވެސް ވަނީ ގޮނޑިތަކެއް ކާމިޔާބުކޮށްފަ އެވެ.

އިންތިހާބުގައި ވާދަކުރެއްވި އިނގިރޭސިވިލާތުގެ މިހާރުގެ ބޮޑުވަޒީރު ރިޝީ ސުނާކްގެ ގޮނޑި އެމަނިކުފާނު ދިފާއު ކުރެއްވި ނަމަވެސް، ކެބިނެޓުގައި މިހާރު ހިމެނޭ ގިނަ މެންބަރުންނަށް ގޮނޑި ދިފާއު ނުކުރެވެ އެވެ.

އިނގިރޭސިވިލާތުގެ ހާލަތު ދަށްވެ ސަރުކާރަށް ފާޑުކިޔުން އަމާޒުވެފައިވާ ދަނޑިވަޅެއްގައި އާންމު އިންތިހާބު ކުއްލި ގޮތަކަށް ޖުލައިގައި ބޭއްވުމަށް ނިންމުމާއެކު، ކޮންޒަވޭޓިވް ޕާޓީއަށް އިންތިހާބު ކާމިޔާބު ކުރެވޭނެކަމާމެދު ގިނަ ބަޔަކު ސުވާލު އުފެއްދި އެވެ.