އެންވަޔަރަމެންޓު މިނިސްޓްރީގެ ކުރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް ހައްޔަރުކުރީ ހަމަ ހަގީގަތުގައި ވެސް ސިހުރުގެ ތުހުމަތަށްތޯ ނުވަތަ އެއީ ރައީސް ޑރ.މުހައްމަދު މުއިއްޒު މާލޭގެ މޭޔަރަކަށް ހުންނެވި އިރު ސިޓީ ކައުންސިލުގައި ހިނގާފައި އޮތް ހިޔާނާތަކާ ގުޅޭ "ޕެން ޑްރައިވް" އެއް ހޯދަން ކުރި ކަމަކަށް ވެދާނެތޯ ކުރީގެ ރައީސް އަބްދުﷲ ޔާމީނު މިރޭ ސުވާލު އުފައްދަވައިފި އެވެ.

ޔާމީނު އެ ސުވާލު ކުރެއްވީ ޕީޕަލްސް ނެޝަނަލް ފްރޮންޓް (ޕީއެންއެފް) އިން އެޕާޓީގެ އޮފީހުގައި މިރޭ ބޭއްވި ޖަލްސާގައި ކުރީގެ ޕޮލިސް ކަމިޝަނަރު ހުސައިން ވަހީދު ވާހަކަ ދައްކަވަނިކޮށް، އޭނާއާ އެވެ. އެ ސުވާލަށް ވަޑައިގެންނެވުމުގެ ގޮތުން އެމަނިކުފާނު ފުރަތަމަ ފާހަގަކުރެއްވީ ރައީސް މުއިއްޒު މާލޭގެ މޭޔަރަކަށް ހުންނެވި އިރު ޝަމްނާޒަކީ ވަރަށް އަރިސްކޮށް އުޅުއްވި ކައުންސިލަރެއް ކަމެވެ.

ސިޓީ ކައުންސިލުގައި ހުރި ކޮރަޕްޝަންތަކަކީ އެމަނިކުފާނު ވިދާޅުވި ގޮތުގައި އެކަންތައްތަކުގެ ވާހަކަ ވަރަށް ގިނައިން އިވޭ މައްސަލަތަކެކެވެ.

"މީގެ ބައެއް މައްސަލަތައް އެބަހުރި މިހާރު ވެސް އޭސީސީ އަަށް ހުށަހެޅިފައި އިނގޭތޯ. އެހެންވީމަ ފަހަރުގައި ވެދާނެތޯ ކައިރިން މަސައްކަތް ކުރި މީހެއް ވީމަ އޭރު ހިނގާފައި ހުރި ކަރަޕްޝަން މައްސަލަތަކުގެ ޕެންޑްރައިވެއް އޮތީމަ އޭނަގެ ގެ ރެއިޑް ކުރުމުގެ ފުރުސަތެއް ހޯދީއޭ. އެހެންވީމަ މިއީ ސިހުރު ހާހުރައިގެ ވާހަކަތޯ ނޫނިއްޔާ އެހެން ކޮންމެވެސް އެއްޗެއް ހޯދާފައި، އެ ކޮންމެވެސް ގޮތަކަށް ބަދަލުވެގެންތޯ މިއުޅެނީ" ޔާމީނު ސުވާލު އުފެއްދެވި އެވެ.

އެމަނިކުފާނު ވިދާޅުވި ގޮތުގައި އެގޮތަށް އެކުގައި މަސައްކަތްކުރާ މީހަކު ހަށިރައްކަލަކަށް ޓަކައި އެފަދަ ކަމެއްގެ މައުލޫމާތު ޕެންޑްރައިވެއްގައި ރައްކާކޮށްގެން ގެންގުޅެފާނެ ކަމަށް ގަބޫލުކުރައްވަން ފަސޭހަ އެވެ. އެހެންވީމާ އެ ކަހަލަ ޕެންޑްރައިވެއް ހޯދަން ޝަމްނާޒް ހައްޔަރު ކުރުމުގެ ޖާގަ އޮވެދާނެތޯ ވެސް އެމަނިކުފާނު ސުވާލު ކުރެއްވި އެވެ.

ޝަމްނާޒް ހައްޔަރުކުރީ ރިޔާސީ ގަނޑުވަރު މުލިއާގެ އިން ފޮނުވި މައްސަލައެއް ނޫން ކަަމަށް ބުނާ ކަމަށާއި އެހެން ނަމަވެސް އެވާހަކަ ގަބޫލުނުކުރެއްވޭ ކަމަށް ވެސް އެމަނިކުފާނު ވިދާޅުވި އެވެ. ޔާމީނު ވިދާޅުވި ގޮތުގައި ފުލުހުން އިސްނަގައިގެން އެފަދަ މައްސަލައެއް ބަލައިފާނެ ކަމަކަށް ގަބޫލެއް ނުކުރެވެ އެވެ.