ޒުވާނުންގެ ދުވަސް ފާހަގަ ކުރުމުގެ ގޮތުން ބާއްވާ ޒުވާނުންގެ އިނާމު ދިނުމުގެ ރަސްމީ ޖަލްސާ ފަސްކޮށްފި އެވެ.

ޒުވާނުންގެ ދުވަހާ ގުޅުވައިގެން ޒުވާނުންނަށް އިނާމު ދިނުމަށް ޖަލްސާ ބާއްވަން ކުރިން ނިންމާފައި އޮތީ އޯގަސްޓު، 12 ގަ އެވެ.

ނަމަވެސް އެ ޖަލްސާ ފަހުގެ ތާރީހަކަށް ބަދަލު ކޮށްފައިވާ ކަމަށް ޔޫތު މިނިސްޓްރީން މިއަދު ކުރި އިއުލާނެއްގައި ބުންޏެވެ. އެ ޖަލްސާ ބާއްވާނެ ތާރީހެއް ފަހުން އިއުލާން ކުރާނެ ކަމަށް ވެސް އެ މިނިސްޓްރީން ބުންޏެވެ.

ދައުލަތުގެ ހަރަދު ކުޑަކުރަން އަޅާ ފިޔަވަޅުތަކުގެ ތެރެއިން ސަރުކާރުގެ ސިޔާސީ މުވައްޒަފުންގެ އަދަދު މަދުކޮށް، އިތުރު ފިޔަވަޅުތައް އަޅަން ނިންމާފައިވާކަން ރައީސް ޑރ. މުހައްމަދު މުއިއްޒު ވަނީ އިއުލާން ކުރައްވައިފަ އެވެ. އެވޯޑު ފަސްކުރީ އެގޮތުން ކަމަށް ބެލެވެ އެވެ.

ސަރުކާރުން އަންނަނީ ފަހަކަށް އައިސް ގިނަ އިވެންޓުތައް ފަސްކުރަމުންނެވެ. އެގޮތުން ސްޕޯޓްސް މިނިސްޓްރީން ބާއްވަން ނިންމި މޯލްޑިވްސް ސްޕޯޓްސް އެވޯޑަށް ވެސް ތައްޔާރުވުމަށްފަހު، ކުއްލި ގޮތަކަށް ވަނީ އެވޯޑު ފަހުގެ ތާރީހެއްގައި ބާއްވާނެ ކަމަށް ބުނެ ފަސްކޮށްފަ އެވެ.

ރާއްޖޭގައި ގައުމީ ފެންވަރުގައި ޒުވާނުންގެ ދުވަސް ފާހަގަކުރަނީ އޮކްޓޯބަރު 22، ގަ އެވެ.