މާލެ އާއި ހުޅުމާލެ ހައި ސްޕީޑު ފައިބަ އޮޕްޓިކް އާ ނެޓްވޯކަކުން ގުޅުވާލައިފި އެވެ.

މި ނެޓްވޯކް ގާއިމުކުރީ އެޗްޑީސީ އިންނެވެ. އެ ކުންފުނިން ކުރިން ވަނީ ހުޅުމާލޭގެ އެއްވަނަ ފިޔަވައްސާއި ދެވަނަ ފިޔަވަހީގައި ވެސް ފައިބަ އޮޕްޓިކް ނެޓްވޯކު އަޅައިފަ އެވެ.

އެޗްޑީސީގެ ފައިބަ އޮޕްޓިކް މި ނެޓްވޯކުގެ ތެރެއިން ލީސް ލައިން އާއި ޑާކް ފައިބަގެ ހިދުމަތަށް އެދުމުގެ ފުރުސަތު ވިޔަފާރިތަކަށް ވަނީ ހުޅުވާލައިފަ އެވެ.

"ވިޔަފާރިތަކަށް ހެޔޮ އަގެއްގައި ޑޭޓާ ކަނެކްޓިވިޓީ ފޯރުކޮށްދިނުމަކީ އެޗްޑީސީގެ އަމާޒެކެވެ. އެހެން ކަމުން، މި ނެޓްވޯކް މާލެއާއި ހުޅުމާލެއާއި ދެމެދު ގުޅުވާލެވުމާއެކު، ވިޔަފާރިތައް ބާރުވެރިކޮށް، ކުދި އަދި މެދުފަންތީގެ ވިޔަފާރިތަކަށް ގިނަ ފުރުސަތުތަކެއް ފަހިވެގެންދާނެ އެވެ،" އެޗްޑީސީން ބުންޏެވެ.

"މި ނެޓްވޯކް ގާއިމްވުމާއެކު، ޑާކް ފައިބަ ކަނެކްޓިވިޓީ ހިދުމަތަށް ފުރަތަމަ ސޮއިކުރި ކަސްޓަމަރަށް މޯލްޑިވްސް އިސްލާމިކް ބޭންކް (އެމްއައިބީ) ވެގެން ދިއުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެކެވެ."

މި ހިދުމަތް ހޯދާ ކަސްޓަމަރުންނަށް އެއް މަސް ދުވަހުގެ މުއްދަތަކަށް ހިލޭ ހިދުމަތް ލިބޭނެ ކަމަށް އެޗްޑީސީން ބުންޏެވެ.

ޑާކް ފައިބާއަކީ ބޭނުންނުކޮށް ހުންނަ ފައިބާ ކޭބަލްތަކެވެ. މި ކޭބަލްތައް ގަންނަ ވިޔަފާރިތަކުން އާންމުކޮށް މި ބޭނުންކުރަނީ ޕްރައިވެޓް ނެޓްވޯކުތައް ހިންގުމަށެވެ.