ސްޕެއިންގެ މެޑްރިޑުން އުރުގުއޭގެ މޮންޓެވީޑިއޯއަށް ދަތުރުކުރި އެއާ ޔޫރޮޕާގެ މަތިންދާބޯޓެއް ކޮޅިގަނޑެއްގައި ޖެހިގެން 30 މީހަކަށް އަނިޔާވެއްޖެ އެވެ.

މި ހާދިސާއާ ގުޅިގެން އެ ބޯޓު ބްރެޒިލްގެ ނެޓަލް އެއާޕޯޓަށް އެމަޖެންސީ ލޭންޑިންއެއް ކޮށްފައިވާއިރު، އަނިޔާވި މީހުން ވަނީ ވަގުތުން ހޮސްޕިޓަލަށް ގެންގޮސް ފަރުވާ ދީފަ އެވެ.

އަނިޔާވި މީހުންގެ ތެރެއިން އެއްވެސް މީހަކަށް ސީރިއަސް އަނިޔާއެއް ނުލިބޭއިރު، ބައެއް މީހުންނަށް ފަރުވާ ދިނުމަށްފަހު ވަނީ ދޫކޮށްލާފަ އެވެ.

މި ހާދިސާގައި ބޯޓަށް ވެސް އެކި ވަރުގެ ގެއްލުންތައްވި އެވެ.

މިދިޔަ މެއި މަހު ގަތަރު އެއާވޭސްގެ މަތިންދާ ބޯޓެއް ކޮޅިގަނޑެއްގައި ޖެހި 12 މީހަކަށް އަނިޔާވި އެވެ. އެކަމާ ގުޅިގެން އެ އެއާލައިނުން ވަނީ ސަލާމަތީ ފިޔަވަޅުތައް ވަރުގަދަކޮށްފަ އެވެ.

މެއި މަހު ހިނގި އިތުރު ހާދިސާއެއްގައި ސިންގަޕޫރު އެއާލައިންސްގެ ފްލައިޓެއް ކޮޅިގަނޑެއްގައި ޖެހި އެކަކު މަރުވެ، ގިނަ ބަޔަކަށް ވަނީ އަނިޔާވެ އައިސީޔޫގައި ފަރުވާދީފަ އެވެ.

މަތިންދާ ބޯޓުތައް ކޮޅިގަނޑުގައި ޖެހުމަކީ ވަރަށް މަދުން ނޫނީ ނުވާ ކަމަކެވެ. ނަމަވެސް މިފަހުން އެފަދަ ދެތިން ހާދިސާއެއް ވަނީ ހިނގައިފަ އެވެ.