މަސްވެރިޔާ އަލީ ސާޖިދުގެ ބަންދަށް ހަތް ދުވަސް ޖަހައިފި އެވެ.

ފުލުހުން ބުނީ އަންހެނެއްގެ ބޮލުގައި ގާބުރިއަކުން ޖެހިކަމުގެ ތުހުމަތުގައި އިއްޔެ ރޭ ހައްޔަރުކުރި ސާޖިދުގެ ބަންދުގެ މުއްދަތު ޖެހީ ރޭގެ ވަގުތެއްގައި ވިލިނގިލި މެޖިސްޓްރޭޓު ކޯޓުން ކަމަށެވެ.

ގއ. ވިލިނގިލިން "އަދަދު" ނޫހަށް މައުލޫމާތު ދިން މީހަކު ބުނީ ސާޖިދު ގާބުރިއަކުން ޖެހީ، ކުޑަ ކުއްޖަކަށް ގަނާކުރި ތުހުމަތު އޭނާ ކުރާ އަންހެން މީހާގެ ބޮލުގައި ކަމަށެވެ. އެ މައްސައިގައި ސާޖިދުގެ ގައިގައި ތަޅައިގަންނަން ބަޔަކު އުޅުނު ކަމަށް އެ ރަށުން ވާހަކަ ދެއްކި މީހަކު ބުންޏެވެ.

ސޯޝަލް މީޑިއާގެ އެކްޓިވިސްޓެއްގެ ގޮތުގައި ވެސް އުޅޭ ސާޖިދު އަންނަނީ މި ސަރުކާރަށް ވަރަށް ބޮޑަށް ފާޑުކިޔަމުންނެވެ. ހާއްސަކޮށް މަސްވެރިންގެ ހައްގުތަކާ ގުޅޭ ގޮތުން އޭނާ އަޑުއުފުލަ އެވެ. އަދި އިޖުތިމާއީ ބައެއް މައްސަލަތައް ވެސް ފެންމަތިކޮށްފައިވެ އެވެ.