ސިހުރު ހެދިކަމުގެ ތުހުމަތުކޮށް ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް ހައްޔަރު ކުރީ އޭނާގެ ފޯނުގައި ހުރި އެއްޗެއް ހޯދުމުގެ މަގުސަދުގައިތޯ އުނގޫފާރު ދާއިރާގެ ކުރީގެ މެންބަރު، މުހައްމަދު ވަހީދު (ވައްޑޭ) ސުވާލު އުފައްދަަވައިފި އެވެ.

އެކްސްގައި ވައްޑޭ ކުރެއްވި ޕޯސްޓެއްގައި ވަނީ ޝަމްނާޒް ހައްޔަރު ކޮށްގެން ފުލުހުން އުޅެނީ ހަމަ ހަގީގަތުގައި ވެސް ސިހުރު ހަދައިގެންތޯ ސުވާލު އުފައްދަވައިފަ އެވެ.

"ޝަމްނާޒު ހައްޔަރުކޮށްގެން ތިޔައުޅުއްވަނީ ހަމަ ސިހުރު ހަދައިގެންތޯ؟ ނުވަތަ އޭނާގެ ފޯނުގައި އޮތް ވީޑިޔޯއެއް ބާވަތުގެ އެއްޗެއް ހޯއްދަވަންތޯ؟،" ރައީސް މުއިއްޒުގެ އެކްސް އެކައުންޓު ޓެގު ކުރައްވައި ކުރި ޕޯސްޓުގައި ވައްޑޭ ލިޔުއްވާފައިވެ އެވެ.

ސިހުރު ހެދުމުގެ ތުހުމަތުކޮށް ޖޫން 23، ގައި ފުލުހުން ހައްޔަރު ކުރީ ޝަމްނާޒް އާއި އޭނާގެ އެއްބަނޑު އެއްބަފާ ކޮއްކޮ ހައްވާ ސަނާ އަލީ ސަލީމް އާއި ސިހުރު ހެދި ކަމަށް ބުނާ ތ. ކިނބިދޫ، ނިވައިދޮށުގޭ، ހުސައިން ސަމީރު އެވެ. ހައްޔަރު ކުރިއިރު ގާތުން ދޭ އެއް އަހަރާއި ފަސް މަހުގެ ކުއްޖަކު ވެސް ޝަމްނާޒުގެ ހުރެ އެވެ.

އެއީ ޝަމްނާޒް އާއި ރައީސް އޮފީހުގެ މިނިސްޓަރު އާދަމް ރަމީޒުގެ ތުއްތު ކުއްޖެކެވެ. ރަމީޒު ވަނީ މި މަހުގެ ތެރޭގައި ޝަމްނާޒް ވަރިކޮށްފަ އެވެ. ޝަމްނާޒް ހައްޔަރު ކުރި ފަހުން ސަރުކާރުން ވަނީ ރަމީޒު މަގާމުން ސަސްޕެންޑުކޮށްފަ އެވެ.

ޝަމްނާޒު ހައްޔަރު ކޮށްގެން އުޅެނީ ކޮން މަގުސަދެއް ހާސިލު ކުރަންތޯ ސުވާލު އުފައްދަވައި ވައްޑޭ އެކްސްގައި ޕޯސްޓު ކުރެއްވިއިރު، ޝަމްނާޒު ހައްޔަރު ކުރުމާ ގުޅޭގޮތުން ފުލުހުން މިހައިތަނަށް އިތުރު އެއްވެސް މައުލޫމާތެއް ހާމަކޮށްފައެއް ނުވެ އެވެ.

ފުލުހުން ހަމައެކަނި ހާމަކުރި މައުލޫމާތަކީ އެމީހުން ހައްޔަރު ކުރީ ރައީސް، ޑރ. މުހައްމަދު މުއިއްޒުއަށް ސިހުރު ހެދުމުގެ ތުހުމަތުގައި ކަމަށެވެ.