މަސްވެރިޔާ އަލީ ސާޖިދު ހައްޔަރުކޮށްފި އެވެ.

ފުލުހުން ބުނީ ސާޖިދު ރޭ ހައްޔަރު ކުރީ "އަންހެނެއްގެ ބޮލުގައި ގާބުރިއަކުން ޖަހައިގެން" ކަމަށެވެ. އިތުރު ތަފުސީލެއް ނުދެ އެވެ.

ގއ. ވިލިނގިލިން "އަދަދު" ނޫހަށް މައުލޫމާތު ދިން މީހަކު ބުނީ ސާޖިދު ގާބުރިއަކުން ޖެހީ، ކުޑަ ކުއްޖަކަށް ގަނާކުރި ތުހުމަތު އޭނާ ކުރާ އަންހެން މީހާގެ ބޮލުގައި ކަމަށެވެ. އެ މައްސައިގައި ސާޖިދުގެ ގައިގައި ތަޅައިގަންނަން ބަޔަކު އުޅުނު ކަމަށް އެ ރަށުން ވާހަކަ ދެއްކި މީހަކު ބުންޏެވެ.

"އެހެންވެ ހިމާޔަތް ދޭށޭ ކިޔާފައި ސާޖިދު ގެންދިޔައީ،" އަދަދު ނޫހަށް މައުލޫމާތު ދިން އެހެން މީހަކު ބުންޏެވެ.

ސޯޝަލް މީޑިއާގެ އެކްޓިވިސްޓެއްގެ ގޮތުގައި ވެސް އުޅޭ ސާޖިދު އަންނަނީ މި ސަރުކާރަށް ވަރަށް ބޮޑަށް ފާޑުކިޔަމުންނެވެ. ހާއްސަކޮށް މަސްވެރިންގެ ހައްގުތަކާ ގުޅޭ ގޮތުން އޭނާ އަޑުއުފުލަ އެވެ. އަދި އިޖުތިމާއީ ބައެއް މައްސަލަތައް ވެސް ފެންމަތިކޮށްފައިވެ އެވެ.