ލ. ދަނބިދޫ ކޯސްވޭއާ ދިމާލު މޫދުގައި މަރުވެފައި އޮތް މީހަކު މިއަދު ހަވީރު ފެނިފައިވާ ކަމަށް ފުލުހުން ބުނެފި އެވެ.

މީޑިއާތަކަށް ފޮނުވި މެސެޖެއްގައި ފުލުހުން ބުނީ މޫދުގައި އޮޔާ ދަނިކޮށް ފެނުނީ އެ ރަށު ނިޔަނދުރުގޭ، އައިމިނަތު އުމަރު، 65، ކަމަށެވެ.

ދަނބިދޫ ހެލްތު ސެންޓަރަށް އޭނާ ގެންދިޔައިރު ވެސް މަރުވެފައިވާ ކަމަށް ފުލުހުން ބުންޏެވެ. އެ މައްސަލަ އިތުރަށް ބަލަމުންދާ ކަމަށް ފުލުހުން ބުންޏެވެ.

ރާއްޖޭގައި ވަރަށް ގިނަ އަދަދެއްގެ މީހުން ކޮންމެ އަހަރަކު ވެސް މޫދުގައި ދިމާވާ އެކި ހާދިސާތަކުގައި މަރުވެ އެވެ. މިފަހުން ރިސޯޓެއްގައި ވެސް މީހަކު ގެނބިގެން މަރުވި އެވެ.