ގުޔާނާ (ޖޫން 28) - އެންމެ ފަހުގެ ޗެމްޕިއަން، އިންގްލެންޑް 68 ލަނޑުން ބަލިކޮށް، އިންޑިއާ އިން 10 އަހަރަށް ފަހު ޓީ20 ކްރިކެޓް ވޯލްޑް ކަޕުން ވަނީ ޖާގަ ހޯދައިފި އެވެ.

ޓީ20 ވޯލްޑް ކަޕްގެ ޗެމްޕިއަންކަން، އެއް ފަހަރު ހޯދި އިންޑިއާ އެންމެ ފަހުން ފައިނަލް ކުޅުނީ 2014 ވަނަ އަހަރު އެވެ. ބަންގްލަދޭޝްގައި އެ ފަަހަރު ކުޅުނު މުބާރާތުގެ ފައިނަލުގައި އިންޑިއާ ބަލިވީ ސްރީ ލަންކާ އަތުން ހަ ވިކެޓުންނެވެ.

އޮސްޓްރޭލިއާގައި، 2022 ވަނަ އަހަރު ބޭއްވި ޓީ20 ވޯލްޑް ކަޕްގެ ސެމީ ފައިނަލުގައި އިންޑިއާ ވަނީ 10 ވިކެޓުން އިންގްލެންޑް އަތުން ބަލިވެފަ އެވެ. މި ފަހަރުގެ ސެމީގައި އިންޑިއާ އިން މި ވަނީ އިންގްލެންޑްގެ ކިބައިން ބަދަލުހިފައިފަ އެވެ.

ގުޔާނާގެ ޕްރޮވިޑެންސް ސްޓޭޑިއަމްގައި ކުޅުނު މިރޭގެ މެޗުގައި، އިންގްލެންޑުން ޓޮސް ދިމާވުމުން ނިންމީ ފީލްޑް ކުރާށެވެ. އިންޑިއާ އިން ކުޅެން އަރައި، ރަނގަޅަށް ފަށައިނުގަނެވިގެން އުޅެނިކޮށް ވިއްސާރަޔާ ހެދި މެޗު މެދުކަނޑާލަން ޖެހުނެވެ.

އިންޑިއާ އިން ކުޅެން އަރައި، 20 އޯވަރުގެ ތެރޭގައި، ހަތް ކުޅުންތެރިން ނުބައިވެެގެން، 171 ލަނޑު ހެދިއިރު، އެންމެ ރަނގަޅަށް ކުޅުނީ، 39 ބޯޅައިން 57 ލަނޑު ހެދި ޓީމުގެ ކެޕްޓަން، ރޯހިތު ޝަރްމާ އެވެ. ވިރާތު ކޯލީ ނުވަ ބޯޅައިން ނުވަ ލަނޑަށް ނުބައިވިއިރު، ދެން، އިންޑިއާ އަށް ތަފާތު ދެއްކީ، ސޫރްޔަކުމާރް ޔާދަވް އާއި ހާޑިކް ޕާންޑްޔާ އެވެ. ސޫރްޔާ ނުބައިވީ، 36 ބޯޅައިން 47 ލަނޑަށެވެ. އަދި ޕާންޑްޔާ ނުބައިވިއިރު ވަނީ 13 ބޯޅައިން 23 ލަނޑު ހަދައިފަ އެވެ.

މި އިނިންގްސްގައި އިންގްލެންޑްގެ ކްރިސް ޖޯޑަން ތިން ވިކެޓް ނެގި އެވެ.

ޖަވާބުގައި އިންގްލެންޑުން ކުޅެން އަރައި، 16.4 އޯވަރުގެ ތެރޭގައި ހުރިހާ ކުޅުންތެރިން ނުބައިވިއިރު، ހެދުނީ 103 ލަނޑެވެ. އިންގްލެންޑަށް އެންމެ ރަނގަޅު ކުޅުމެއް ދެއްކީ، 15 ބޯޅައިން 23 ލަނޑު ހެދި ކެޕްޓަން، ޖޯޝް ބަޓްލާ އާއި 19 ބޯޅައިން 25 ލަނޑު ހެދި ހެރީ ބްރޫކް އަދި 15 ބޯޅައިން 21 ލަނޑު ހެދި ޖޯފްރާ އާޗާ އެވެ.

އިންޑިއާގެ ބޯލަރުން ތަފާތު ދެއްކި މި މެޗުގައި، އާޒާރު ޕަޓޭލް އާއި ކުލްދީޕް ޔާދަވް، ކޮންމެ ކުޅުންތެރިއަކު ތިން ވިކެޓް ނެގިއިރު، ޖަސްޕްރީތު ބުމްރާ ވަނީ ދެ ވިކެޓް ނަގައިފަ އެވެ.

ޓީ20 ވޯލްޑް ކަޕްގެ ޗެމްޕިއަންކަން، 2007 ވަނަ އަހަރު ހޯދި އިންޑިއާ އިން ހޮނިހިރު ދުވަހުގެ ފައިނަލުގައި ކުޅޭނީ ދެކުނު އެފްރިކާއާ އެވެ.

ފުރަތަމަ ފަަހަރަށް ފައިނަލުގައި ކުޅޭ ދެކުނު އެފްރިކާ ވަނީ ސެމީގައި އަފްގާނިސްތާން ބަލިކޮށްފަ އެވެ. އިންޑިއާ އާއި ދެކުނު އެފްރިކާ އަކީ މި ފަހަރުގެ ޓީ20 ވޯލްޑް ކަޕްގައި ބަލިނުވެ އޮތް ދެ ޓީމެވެ. އެހެންކަމުން، މި ފަހަރަކީ، ޓީ20 ވޯލްޑް ކަޕް ތާރީހުގައި ޗެމްޕިއަަނަކު ބަލިނުވެ، ތަށި އުފުލާލާނެ ފުރަތަމަ ފަހަރެވެ.