މިއުނިކް (ޖޫން 25) - ޔޫރޯ ފުޓްބޯޅަ މުބާރާތުގެ ގްރޫޕް ސީގައި މިރޭ ކުޅޭ މެޗުން ސާބިއާ ބަލިކޮށް އުފާފާޅުކުރަން ބޭނުންވާ ކަމަށް ޑެންމާކްގެ ކޯޗު ކެސްޕާ ހިއުލްމަންޑް ބުނެފި އެވެ.

މި ފަހަރުގެ މުބާރާތުގައި ޑެންމާކް ކުޅުނު ދެ މެޗު ވެސް ނިމުނީ އެއްވަރުވެގެންނެވެ. ފުރަތަމަ މެޗުގައި ސްލޮވީނިއާ އަތުން 1-1 އިން އެއްވަރުވިއިރު، ދެ ވަނަ މެޗުގަައި އިންގްލެންޑާ އެއްވަރުވީ ވެސް އެ ނަތީޖާ އިންނެވެ.

ގްރޫޕް ސީ އިން ގަދަ 16 ޔަގީންވެފަައި އޮތީ އިންގްލެންޑަށެވެ. ދެން، އޮތް ޖާގަ އަށް ވާދަކުރުމުގެ ފުރުސަތު ބާކީ ތިން ޓީމަށް ވެސް އެބައޮތެވެ. އިންގްލެންޑުން އެއް ވަނައިގައި އޮތީ ދެ މެޗުން ހަތަރު ޕޮއިންޓާ އެކު އެވެ. ދެ ވަނައިގައި އޮތް ޑެންމާކާއި ތިން ވަނައިގައި އޮތް ސްލޮވީނިއާ އަށް ދެ ޕޮއިންޓް ލިބިފައިވާއިރު، ފުލުގައި އޮތް ސާބިއާގެ އޮތީ އެއް ޕޮއިންޓެވެ.

މިރޭ ސާބިއާއާ އެއްވަރުކޮށްލައިގެން ވެސް ޑެންމާކަށް އަނެއް ބުރަށް ދެވޭނެ އެވެ. އެކަމަކު، އެ ޓީމުގެ ކޯޗު ހިއުލްމަންޑްގެ ވިސްނުމަކީ މޮޅެއް ހޯދުމެވެ.

"މެޗަށް ފަހު، މޮޅުވެެގެން ލޮކަ ރޫމަށް އައިސް ލަވަކިޔައި އުފާފާޅުކުރުން އަހަރެމެން ވަރަށް މިސް އެބަވޭ. އަހަރެމެންނަށް އެބައޮތް އުންމީދެއް އެއްވަރުކޮށްލައިގެން ވެސް ފުއްދާލެވިދާނެކަން، އެކަމަކު، އިތުރު ގޮތްތަކެއް ވެގެން ކަންކަން ހާސިލްކުރަން ބޭނުމެއް ނޫން، އަހަރެމެން ބޭނުމީ މޮޅެއް،" ހިއުލްމަންޑް ބުންޏެވެ.

އެންމެ ފަހުން ބޭއްވި ޔޫރޯގެ ސެމީ ފައިނަލަށް ދަތުރުކުރި ޑެންމާކް ޓީމުގެ ކޯޗު ހިއުލްމަންޑް ބުނީ މި ފަަހަރުގެ ޓީމުގައި ވެސް އެ ފެންވަރު އެބަހުރި ކަމަށާއި ބޭނުންވަނީ މެޗުތަކަކުން މޮޅުވެ، އެ ކޮންފިޑެންސް ގެނައުން ކަމަށެވެ.

ޑެންމާކުން އެންމެ ފަހުން ބޭއްވި ޔޫރޯގައި ވެސް ޑެންމާކް ފުރަތަމަ މޮޅު ހޯދީ ގްރޫޕްގެ ފަހު މެޗުގަ އެވެ. އެންމެ ފަހުން ޔޫރޯގައި ހާސިލްކުރި ފަަދަ ކަންކަން ކުރަން ފަށަން މިރޭގެ މެޗުގެ ބޭނުންހިފިދާނެ ކަމަށް ހިއުލްމަންޑް ގަބޫލުކުރެ އެވެ.

ސާބިއާ އިން މިނިވަން ދައުލަތެއްގެ ގޮތުގައި ފުޓްބޯޅައިގައި ވާދަކުރަން ފެށި ފަހުން ކުޅުނު ތިން މެޗުން ވެސް ޑެންމާކް ވަނީ މޮޅުވެފަ އެވެ.

ޑެންމާކް އާއި ސާބިއާ ކުޅޭ މެޗު ފަށާނީ މިރޭ 12 ޖަހާއިރު އެވެ.