ބޮޑު އީދު ފާހަގަ ކުރުމުގެ ގޮތުން ބޮޑުބެރާއި ސަގާފީ އެހެނިހެން ކުޅިވަރުތަކާއެކު ނެޝަނަލް ސެންޓާ ފޯ ދި އާޓްސްއިން މާލޭގައި ކުރިއަށް ގެންދާ ކުޅިވަރު ހަރަކާތްތަކުގައި އަމަލީގޮތުން ރައީސް ޑރ. މުހައްމަދު މުއިއްޒުގެ ދެކަނބަލުން ބައިވެރިވެވަޑައިގަންނަވަން ނިންމަވައިފި އެވެ.

އެންސީއޭއިން ބުނީ އީދުގެ ހަރަކާތްތައް ފެށުމަށް ހަަމަޖެހިފައި ވަނީ އީދު ވިލޭރޭ އޮންނަ "ވެދުމާ ދިޔުން" ހަރަކާތުން ކަމަށެވެ. ރައީސްގެ ދެކަނބަލުން ބައިވެރިވެވަޑައިގަންނަވާ ގޮތަށް ހަމަޖެހިފައި ވަނީ އެ ހަރަކާތުގަ އެވެ.

ވެދުމާ ދިޔުމަކީ އިހުގައި ތޮށިލުން ފަދަ ސަރުކާރުގެ ގަދަ މަސައްކަތެއް ކުރުމަށްފަހު ލަވަކިޔަމުން ނަށަމުން ރަސްގެފާނު ހުންނަވާ ގަނޑުވަރު ދޮށަށް ގޮސް ލަވަކިޔައި ނެށުމެވެ.

އީދު ތެރޭގައި ވެދުމާ ދަނީ އީދު ކުޅިވަރުތައް ފެށުމުގެ ހުއްދަ ހޯދުމުގެ ގޮތުންނެވެ. އެ ރަށެއްގައި ކުޅެން ހަމަޖެހިފައިވާ ހުރިހާ ކުޅިވަރުތަކަށް ހުއްދަ ދޭނީ އެ ރަށެއްގެ އެންމެ ކަމުވޮށިގެންވާ މީހެކެވެ.

ރައީސްގެ ދެކަނބަލުން ބައިވެރިވެވަޑައިގަންނަވާ ވެދުމާ ދިޔުމުގެ ހަރަކާތް ކުރިއަށް ގެންދާނީ އިހުގައި އެކަން ކޮށް އުޅުނު ގޮތަށް، ބޮޑުބެރާއި ދިގު ދަނޑީގެ ފަރި ހަރަކާތްތަކާއެކު ކަމަށް އެންސީއޭއިން ބުންޏެވެ. ވެދުމާ ދާއިރު އެ ސަފުގެ އެންމެ ކުރީގައި ހުންނަވާނީ ޔޫތު މިނިސްޓަރު، އިބްރާހިމް ވަހީދު އެވެ.

ތިން ދުވަހަށް ބަހާލައިގެން އެންސީއޭއިން ކުރިއަށް ގެންދާ އީދު ކުޅިވަރުތައް މާލޭގެ އެކި ސަރަހައްދުތަކުގައި ކުރިއަށް ގެންދިޔުމަށް ވަނީ ނިންމައިފަ އެވެ.

އެގޮތުން އީދު ދުވަހު މާލޭގައި ޖުމުލަ 11 ހަރަކާތެއް ކުރިއަށް ގެންދިޔުމަށް އެންސީއޭއިން ނިންމައިފައިވެ އެވެ. ބޮޑު ޖަމާއަތުގައި ކުރެވޭ އީދު ނަމާދުން ފަށާ ހަރަކާތްތަކުގެ ތެރޭގައި މަޖީދީ މަގުގައި ބާއްވާ އީދު ސަޔާއި ހަވީރު މާލޭގެ އަށް ސަރަހައްދެއްގައި ކުޅޭ ސަގާފީ ކުޅުވަރުތައް ހިމެނެ އެވެ.

ޖެހިގެން އަންނަ ވަޅު އީދު ދުވަހު ހެނދުނު އާޓިފިޝަލް ބީޗުގައި ފެންކުޅި ކުޅުމަށް ވަނީ ނިންމައިފަ އެވެ.