ގާހިރާ، މިސްރު (ޖޫން 13) - ފީފާ ވޯލްޑް ކަޕް ކޮލިފައިންގައި ދާދި ފަހުން މިސްރުން ކުޅުނު މެޗެއްގައި އެ ޓީމުގެ ކެޕްޓަން، މުހައްމަދު ސަލާހު ދަނޑުން ފައިބަން ދެކޮޅު ހެދި ކަމަށް މީޑިއާގައި ދެކެވުނު ވާހަކަ މިސްރުގެ ފުޓްބޯޅަ ފެޑެރޭޝަނުން ދޮގުކޮށްފި އެވެ.

ސަލާހު، 31، ވަނީ ދާދި ފަހުން މިސްރުން ކުޅުނު ވޯލްޑް ކަޕް ކޮލިފައިން ދެ މެޗުގައި، ބުރްކީނާ ފާސޯ އާއި ގިނީ ބިސާއުއާ ދެކޮޅަށް ކުޅެފަ އެވެ. މީގެ ތެރެއިން ގިނީ ބިސާއުއާ ދެކޮޅަށް ކުޅުނު މެޗުގައި ސަލާހު ލަނޑު ވެސް ޖެހި އެވެ.

އެކަމަކު، ސަލާހުގެ ވާހަކަތައް މީޑިއާގައި ދެކެވުނީ، ގިނީ ބިސާއު މެޗު 1-1 އިން އެއްވަރުވިއިރު، މެޗުގެ ފަހު ކޮޅުގައި ސަލާހު ބަދަލުކުރަން އުޅުމުން އޭނާ ދަނޑުން ފައިބަން ދެކޮޅު ހެދި ކަމަށް ބުނެ އެވެ. އެ ވާހަކަތައް މީޑިއާގައި ދެކެވުނުއިރު، މިސްރު ފުޓްބޯޅަ ފެޑެރޭޝަނުން ބުނީ އެއީ ހަގީގަތެއް ނެތް ވާހަކަތަކެއް ކަމަށެވެ.

"ސަލާހު ދަނޑުން ފައިބަން ދެކޮޅު ހެދި ކަމަށް ބުނެ ތި ދެކެވޭ ވާހަކަތަކުގައި އެއްވެސް ހަގީގަތެއް ނެތް. އެންމެ ފުރަތަމަ ކަމަކަށް ސަލާހު ބަދަލުކުރަން އުޅުނު ވަގުތެއް ވެސް ނޫން އެއީ. ނާސިރު މާހީރު ކުޅެން އަރުވަން ނިންމީ، ހޮސާމް ހަސަންގެ ބަދަލުގައި،" މިސްރުގެ ފުޓްބޯޅަ ފެޑެރޭޝަނުގެ ބަޔާނުގައިވެ އެވެ.

މިސްރުގެ މީޑިއާ އާއި ސަލާހުގެ ގުޅުން ގޯސްވެފައިވަނީ މި އަހަރުގެ ކުރީކޮޅު ކުރިއަށްދިޔަ އެފްރިކަން ކަޕް އޮފް ނޭޝަންސްގެ ތެރޭގަ އެވެ. އެ ގޮތުން، ސަލާހު އަށް ލިބުނު އަނިޔާއަކާ ގުޅިގެން، މުބާރާތުގެ މެދުތެެރެއިން ޓީމުގެ ކޭމްޕް ދޫކޮށް، އޭނާ ލިވަޕޫލަށް އައުމުން، މިސްރުގެ މީޑިއާ އިން އެކަމަށް ވަރަށް ބޮޑަށް ފާޑުކިޔާފައިވެ އެވެ.