ކުވެއިތުގައި ބިދޭސީ މުވައްޒަފުން އުޅޭ އިމާރާތެއްގައި ރޯވެ 49 މީހަކު މަރުވެއްޖެ އެވެ.

ރިޕޯޓްތައް ބުނާ ގޮތުން ހާދިސާގައި މަރުވި މީހުންގެ ތެރޭގައި އިންޑިއާގެ 41 މީހުން ހިމެނެ އެވެ. އޭގެ ތެރެއިން 11 މީހުން ނިސްބަތްވަނީ ކެރެލާއަށެވެ.

ނަމަވެސް ހާދިސާގައި މަރުވި މީހުން ނިސްބަތްވާ ގައުމުތައް މިހާތަނަށް ރަސްމީކޮށް ކުވައިތުގެ ސަރުކާރުން ހާމަކޮށްފައެއް ނުވެ އެވެ.

ކުވައިތުގައި ހުންނަ އިންޑިއާ އެމްބަސީން ބުނީ ހާދިސާގައި ޒަހަމްވި 47 މީހަކު ހޮސްޕިޓަލަށް ފަރުވާ ދިނުމަށް ގެންދިޔަ ކަމުގެ މައުލޫމާތު ލިބުނު ކަމަށެވެ.

މި ހާދިސާއާ ގުޅިގެން ކުވެއިތުގެ ބޮޑުވަޒީރު ވަނީ ރޯވި އިމާރާތުގެ ވެރިފަރާތުން، އިހުމާލުވުމުގެ އިތުރުން ގަވާއިދާ ހިލާފުވެފައިވާކަން ފާހަގަކުރައްވާފަ އެވެ.

ހާދިސާއާ ގުޅޭ ތަހުގީގެއް މިހާރު ވަނީ ފަށައިފަ އެވެ. އަދި އިހުމާލުވި ފަރާތްތަކާމެދު ހަރުކަށި ފިޔަވަޅު އަޅާނެ ކަމަށް ކުވައިތުގެ ސަރުކާރުން ވަނީ ބުނެފަ އެވެ.