އއ. ތޮއްޑޫ ކައުންސިލް އިދާރާގެ ފުރާޅަށް ގާއުކި މައްސަލައިގައި ހައްޔަރުކުރި އަށް މީހުން ވެސް ދޫކޮށްލައިފި އެވެ.

ފުލުހުން ބުނީ މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމަން ކޯޓަށް ހާޒިރު ކުރުމުން، ކޯޓުން ވަނީ ޝަރުތު ކުރުމަށްފަހު ދޫކޮށްލާފައިވާ ކަމަށެވެ.

ކޯޓު އަމުރެއްގެ ދަށުން މި އަށް މީހުން ހައްޔަރުކުރީ ޖޫން 5، ގައި ތޮއްޑޫ ކައުންސިލް ކުރިމަތީގައި މުޒާހަރާކޮށް އާންމު މަސްލަހަތު ނަގާލުމަށް މަސައްކަތްކޮށް، ކައުންސިލް ފުރާޅަށް ގާ އުކި މައްސަލައިގައި ކަމަށް ފުލުހުން ބުންޏެވެ.

ތޮއްޑޫގައި މި މަހު ފަހެއްގައި މުޒާހަރާ ކުރީ އެ ރަށުގެ ދަނޑުބިންތައް ދަނޑުވެރިން އަތުން އަތުލަން ނިންމާފައިވާ ކަމަށް ބުނެ އެވެ.

މި މުޒާހަރާގެ ތެރެއިން ފުލުހުކަށް ވެސް އަނިޔާވި އެވެ. ފުލުސް މީހާއަށް އަނިޔާވީ މުޒާހަރާގެ ބައިވެރިން ތޮއްޑޫ ކައުންސިލުގެ ފުރާޅަށް ގާ އުކަން ފެށުމުން ކަމަށް އެ ދުވަހު ފުލުހުން ބުނެފައިވެ އެވެ.