ނިއުޔޯކް، ޔުނައިޓެޑް ސްޓޭޓްސް (ޖޫން 11) - އެމެރިކާ އާއި ވެސްޓް އިންޑީސްގައި މިހާރު ކުރިއަށްދާ ޓީ20 ކްރިކެޓް ވޯލްޑް ކަޕްގައި ބަންގްލަދޭޝް ހަތަރު ލަނޑުން ބަލިކޮށް ދެކުނު އެފްރިކާ އިން ސުޕަ އެއިޓްސްއާ ގާތަށް ޖެހިލައިފި އެެވެ.

ދެ ވަނަ ބުރުގެ ޖާގަ ހޯދާ ފުރަތަމަ ޓީމަކީ ދެކުނު އެފްރިކާ އަށް ވުމުގެ ފުރުސަތު ބޮޑެވެ. ދެކުނު އެފްރިކާ އިން ވަނީ މި ފަހަރުގެ މުބާރާތުގައި އެ ޓީމުން ކުުޅުނު ތިން މެޗުން ވެސް މޮޅުވެފަ އެވެ. ފުރަތަމަ މެޗުން، ސްރީ ލަންކާ އަތުން ހަ ވިކެޓުން މޮޅުވިއިރު، ދެ ވަނަ މެޗުން، ނެދަލެންޑްސް ބަލިކުރީ ހަތަރު ވިކެޓުންނެވެ.

ބަންގްލަދޭޝާ ދެކޮޅަށް ރޭ ދެކުނު އެފްރިކާ އިން ކުޅުނު މެޗުގައި، ޓޮސް ދިމާވުމުން އެރީ ކުޅޭށެވެ. އެ ޓީމުން، 20 އޯވަރުގެ ތެރޭގައި ހަ ކުޅުންތެރިން ނުބައިވިއިރު، 113 ލަނޑު ހެދި އެވެ. އެންމެ ރަނގަޅު ކުޅުމެއް ދެއްކީ، 44 ބޯޅައިން 46 ލަނޑު ހެދި ހެއިންރިޗް ކްލާސެން އެވެ. އެ ޓީމުގެ ޑޭވިޑް މިލާ އަށް ހެދުނީ، 38 ބޯޅައިން 29 ލަނޑެވެ.

މި އިނިންސްގައި ބަންގްލަދޭޝްގެ ތަންޒިމް ހަސަން ވަނީ ހަތަރު އޯވަރަށް ތިން ވިކެޓް ނަގައިފަ އެވެ.

ބަންގްލަދޭޝް އިން ކުޅެން އަރައި، 20 އޯވަރު ތެރޭގައި ހަތް ކުޅުންތެރިން ނުބައިވިއިރު ހެދުނީ 109 ލަނޑެވެ. އެންމެ ރަނގަޅު ކުޅުމެއް ދެއްކީ، 34 ބޯޅައިން 37 ލަނޑު ހެދި ތައުހީދު ރިދޯއި އެވެ.

ދެކުނު އެފްރިކާ އިން ބަންގްލަދޭޝް ބަލިކުރިއިރު، މި އިނިންސްގައި ދެކުނު އެފްރިކާގެ ކޭޝަވް މަހަރާޖު ވަނީ ތިން ވިކެޓް ނަގައިފަ އެވެ.