ރާއްޖޭން މި އަހަރު ހައްޖަށް ދާ ދިވެހިންގެ ކަންކަން ބަލަހައްޓަން "އަމީރުލް ހައްޖު"ގެ ގޮތުގައި އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ހަމަޖައްސަވައިފި އެވެ.

އަމީރުލް ހައްޖުގެ ގޮތުގައި ވަޑައިގަންނަވާނެ ބޭފުޅުން ރާއްޖޭގައި ކަނޑައަޅަނީ އަބަދުވެސް ރައީސެވެ. އެ މީހަކީ އެ އަހަރު ރާއްޖޭން ހައްޖަށް ދާ އެންމެންގެ ކަންކަން ކައިރިން ބަލަހައްޓަން ރައީސް ކަނޑައަޅުއްވާ ބޭފުޅެކެވެ.

މިއީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން އައި ފުރަތަމަ ހައްޖެވެ. އެހެންކަމުން މި ވެރިކަމުގައި ފުރަތަމަ އަމީރުލް ހައްޖަކަށް ވުމުގެ ޝަރަފު ލިބިވަޑައިގަތީ މި އެޑިއުކޭޝަން މިނިސްޓަރަށެވެ.

އަމީރުލް ހައްޖު ކަމަށް އެޑިއުކޭޝަން މިނިސްޓަރު ޝަފީއު ހަމަޖެއްސެވި ކަން އިއުލާންކުރެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ހައްޖަށް ފުރާވަޑައިގަތުމުގެ ކުރިން ނޫސްވެރިންނާ ބައްދަލުކުރައްވަމުންނެވެ. ޝަހީމާއެކު ޝަފީއު ވެސް މިއަދު ފުރާވަޑައިގަތް ކަމަށް ވިދާޅުވި އެވެ.

"މި އަހަރު ރާއްޖޭގެ ހައްޖާޖީންގެ ކަންތައްތަކުގެ އިސްކޮށް ވަޑައިގަންނަވާ ބޭފުޅެއްގެ ގޮތުގައި ރައިސުލްޖުމްހޫރިއްޔާ ކަނޑައެޅުއްވީ މިނިސްޓާ އޮފް އެޑިއުކޭޝަން ޑރ. އިސްމާއިލް ޝަފީއު، އެހެންމަ އިސްމާއިލް ޝަފީއު އަޅުގަނޑާ އެއްކޮށް މިއަދު ފުރާވަޑައިގަންނަވާނެ ފްލައިޓުގައި،" އޭނާ ވިދާޅުވި އެވެ.

މި އަހަރު ރާއްޖެއިން ހައްޖަށް މީހުން ގެންދަނީ ހަމައެކަނި ހައްޖު ކޯޕަރޭޝަނުންނެވެ. އިސްލާމިކް މިނިސްޓްރީ ބުނެފައިވާ ގޮތުގައި އެހީތެރިން ފިޔަވާ މި އަހަރު ރާއްޖެއިން 980 މީހަކު ހައްޖަށް ދާނެ އެވެ. ސައުދީން ރާއްޖެއަށް ދޫކުރާ ހައްޖު ކޯޓާގެ އަދަދަކީ 1000 އެވެ.