ކޮންމެ އަހަރެއްގެ ވެސް ރޯދަ މަހު ބޭނުން ކުރުމަށް ސައުދީއަރަބިއްޔާއިން ރާއްޖެއަށް ހަދިޔާ ކުރާ ކަދުރު ޝިޕްމެންޓު މިފަހަރު ވެސް ލިބިފައިވާ ކަމަށް އިސްލާމިކް މިނިސްޓަރު، މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މީޑިއާތަކަށް ޝަހީމް ފޮނުއްވި މެސެޖެއްގައި ވިދާޅުވީ އަންނަ ރޯދަ މަހު ބޭނުން ކުރުމަށް ސައުދީން 50 ޓަނުގެ ކަދުރު ހަދިޔާ ކޮށްފައިވާ ކަމަށެވެ. އަދި އެ ކަދުރު ޝިޕްމެންޓު މިހާރު ރާއްޖެއަށް ލިބިފައިވާ ކަމަށް ވެސް ޝަހީމް ވިދާޅުވި އެވެ.

"ސައުދީއަރަބިއްޔާގެ ސަރުކާރުން ކޮންމެ އަހަރަކު ރަމަޟާން މަހަށް ދެއްވާ 50 ޓަނުގެ ކަދުރު ރާއްޖެ އަތުވެއްޖެ، މިނިސްޓްރީއަށް މިހާރު ވަނީ ލިބިފައި،" ޝަހީމް ވިދާޅުވި އެވެ.

ރޯދަ މަހާ ދިމާކޮށް ކޮންމެ އަހަރަކު ވެސް ސައުދީން ރާއްޖެއަށް ކަދުރު ހަދިޔާ ކުރެ އެވެ. އެގޮތުން ފާއިތުވި ދެއަހަރު ވެސް ސައުދީން 50 ޓަނުގެ ކަދުރު ރާއްޖެއަށް ހަދިޔާ ކޮށްފައިވެ އެވެ.

ޝަހީމް ވިދާޅުވީ ރޯދަ މަސް ފެށުމުގެ ކުރިން ކަދުރުތައް ބަހައި ނިންމާނެ ކަމަށެވެ. ކަދުރު ބަހާނީ ސީދާ ކޮން އުސޫލެއްގެ ދަށުން ކަމެއް އޭނާ ވިދާޅެއް ނުވެ އެވެ.

ނަމަވެސް މިސްކިތްތަކުގައި ރޯދަ ވީއްލުން އިންތިޒާމު ކުރާ ޖަމިއްޔާތަކަށް ސައުދީ ކަދުރުން ބައެއް ދެއްވާނެ ކަމަށް ޝަހީމް ވިދާޅުވި އެވެ.