ޕެރިސް (ޖޫން 9) - ފްރެންޗް އޯޕަންގެ އަންހެން ބައިގެ ފައިނަލްގައި އިޓާލީގެ ޖޭސްމިން ޕައޮލީނީ ބަލިކޮށް ޖެހިޖެހިގެން ތިން ވަނަ ފަހަރަށް ޕޮލެންޑްގެ އީގާ ސްވިއަޓެކް މުބާރާތުގެ ޗެމްޕިއަންކަން ހޯދައިފި އެވެ.

ބޮޑު މުބާރާތެއްގެ ފައިނަލްގައި ފުރަތަމަ ފަހަރަށް ވާދަކުރި ޕައޮލީނި އަތުން ސްވިއަޓެކް މޮޅުވީ 6-2 އަދި 6-1 އިންނެވެ.

ދުނިޔޭގެ އެއްވަނަ ސީޑް ކަމަށްވާ ސްވިއަޓެކް އަކީ ޓެނިހުގެ "އޯޕަން އިރާ" 1968 ވަނަ އަހަރު ފެށުނު ފަހުން، ޖެހިޖެހިގެން ތިން ފަހަރު އަންހެނުންގެ ސިންގަލްސް މުބާރާތް ކާމިޔާބުކުރި ތިން ވަނަ ކުޅުންތެރިޔާ އެވެ. ކުރިން މި ރެކޯޑް ހޯދީ މޮނިކާ ސަލަސް އަދި ޖަސްޓީން ހެނިން އެވެ.

ސްވިއަޓެކް އަކީ "އޯޕަން އިރާ"ގައި ފްރެންޗް އޯޕަން ޖެހިޖެހިގެން ތިން ފަހަރު ކާމިޔާބުކުރި ފުރަތަމަ ކުޅުންތެރިޔާ އެވެ.

މިއީ ސްވިއަޓެކް ފްރެންޗް އޯޕަން ކާމިޔާބުކުރި ހަތަރު ވަނަ ފަހަރެވެ. އަދި އޭނާގެ ކެރިއަރުގައި ފަސް ވަނަ ގްރޭންޑް ސްލޭމް މުބާރާތެވެ. ސްވިއަޓެކް ވަނީ 2022 ވަނަ އަހަރު ޔޫއެސް އޯޕަން ކާމިޔާބުކޮށްފަ އެވެ.

ސްވިއަޓެކް ބުނީ ފްރެންޗް އޯޕަން އަކީ އޭނާ އެންމެ ގަޔާވެގެން، އެންމެ ކުޅޭ ހިތުން ކުޅޭ މުބާރާތް ކަމަށެވެ. އަދި މިއީ އޭނާގެ ކެރިއަރުގައި ލިބުނު ބޮޑު ކާމިޔާބެއް ކަމަށެވެ.