ބައިނަލްއަގުވާމީ ގޮތުން މާދަމާ ފާހަގަކުރާ ކަނޑުގެ ދުވަސް ފާހަގަކުރަން ކުރިއަށް ގެންދާ ހަރަކާތެއްގެ ގޮތުގައި ވަޒީރުންނާއި މުއައްސަސާތަކުން މަސް ރޭހެއްގައި ބައިވެރިވެއްޖެ އެވެ.
މިއަދު 15:00 އިން މިރޭ 9:30 އަށް ކުރިއަށްދާ މި މަސްރޭހަކީ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ކުރިއަށް ގެންދާ ހަރަކާތެކެވެ. ޓީމުތަކުން މިހާރު މަހަށް ފުރާފައިވާއިރު އެނބުރި އަންނާނީ މިރޭ 9:30 ގައި ހުޅުމާލެ ލަކުޑި ޖެޓީއަށެވެ.
އެ ވުޒާރާގެ މީޑިއާ ޓީމުން ފޮނުވި މެސެޖުގައި ބުނީ، މިއަދުގެ މަސްރޭހުގައި، "ކެބިނެޓްގެ ވަޒީރުންގެ ޓީމާއި އެހެނިހެން މުއައްސަސާތަކުގެ ޓީމުތައް ބައިވެރިވާ" ކަމަށެވެ.
ނަމަވެސް މިހާތަނަށް ވަޒީރުންގެ ޓީމުގެ ފޮޓޯއެއް ސޯޝަލް މީޑިއާގައި ހިއްސާކޮށްފައެއް ނުވެ އެވެ. އެހެން ގްރޫޕުތަކުގެ ފޮޓޯ އަދި މަސްރޭސް ކުރިއަށްދާ ގޮތުގެ ފޮޓޯތައް މިނިސްޓްރީން ދަނީ ސޯޝަލް މީޑިއާގައި ޕޯސްޓުކުރަމުންނެވެ.
މަސްރޭހުގެ އިތުރުން މާދަމާ "އެންމެން މޫދަށް" ގެ ނަމުގައި ރަށްރަށުގައި ވީހާވެސް ގިނަބަޔަކު ބައިވެރިވާ ހަރަކާތްތަކެއް ކުރިއަށް ގެންދިއުމަށް މިނިސްޓްރީން ވަނީ ނިންމާފަ އެވެ.
މިނިސްޓްރީން ރާވާފައިވާ އިތުރު ހަރަކާތްތަކުގެ ތެރޭގައި ސޯޝަލް މީޑިއާ މެދުވެރިކޮށް ބާއްވާ ކުއިޒް މުބާރާތަކާއި، މާލެ ސަރަހައްދުގެ ސުކޫލުތަކުގެ ދަރިވަރުންނަށް އަމާޒުކޮށްގެން ދުވަހާ ގުޅޭ މައުލޫމާތު ސެޝަނެއް ކުރިއަށް ގެންގޮސް ސެޝަންގައި ބައިވެރިވާ ދަރިވަރުން، މޫދަށް އަޅާ ކުނި މަދު ކުރުމަށް ގަރާރެއްގައި ސޮއި ކުރުންވެސް ހިމެނެ އެވެ.
