މޮނާކޯ، ފްރާންސް (ޖޫން 6) - މީގެ ހަތް އަހަރު ކުރިން، ބާސެލޯނާ އިން އޮސްމާން ޑެމްބެލޭ ގަތްއިރު، އެ ޓީމަށް ކީލިއަން އެމްބާޕޭ ގަތުމުގެ ފުރުސަތު އޮތް ކަމަށް ސުޕަ އޭޖެންޓް، ޖޯސެޕް މާރިއާ މިންގޭލާ ހާމަކޮށްފި އެވެ.

އެމްބާޕޭ ވަނީ، ދާދި ފަހުން ޕީއެސްޖީ ދޫކޮށް ހިލޭ ޓްރާންސްފާއެއްގައި ރެއާލް މެޑްރިޑަށް ސޮއިކޮށްފަ އެވެ.

ބާސެލޯނާ އަށް ޑިއޭގޯ މަރަޑޯނާ އާއި ލިއޮނަލް މެސީގެ ޑީލް މަގުފަހިކޮށްދިން އޭޖެންޓް މިންގޭލާ ބުނީ، އޭނާ މެދުވެރިވެގެން، އެމްބާޕޭ ގަންނަން ބާސެލޯނާ އަށް ފުރުސަތު ދިން ކަމަށެވެ.

"މޮނާކޯގައި އޭރު އަަހަރެންގެ ދަރިފުޅު ހުރީ، އޭނަ އަހަންނަށް މައުލޫމާތު ދިނީ، މޮނާކޯގެ މާލީ މައްސަލަތަކާ ހެދި އެ ޓީމުން ކުޅުންތެރިން ވިއްކާލަން އުޅޭކަން، އެ ހިސާބުން އަހަރެން އަމިއްލަ އަށް ގޮސް 18 އަހަރުގެ އެމްބާޕޭގެ އާއިލާއާ ވާހަކަ ދައްކައި، ބާސެލޯނާ އަށް ދާން އެއްބަސްކުރުވިން، އެމްބާޕޭ ވެސް ބާސެލޯނާ އަށް ދާ ގޮތަށް ހުރީ،" މިންގޭލާ ބުންޏެވެ.

އޭނާ ބުނީ، އެމްބާޕޭ ބާސެލޯނާ އަށް ގެންދަން އުޅުނީ، 2017 ވަނަ އަހަރު ނޭމާ ޕީއެސްޖީ އަށް ގެންދިއުމުން، އެ މަގާމަށް ބާސެލޯނާ އިން ކުޅުންތެރިއަކު ހޯދިއިރު ކަމަށެވެ.

"ބާސެލޯނާ އިން ބުނީ އެ އަގުގައި، އޮސްމާން (ޑެމްބެލޭ) ގަތުން މާ ރަނގަޅުވާނެ ކަމަށް. އޭރު ޑޯޓްމަންޑްގައި ހުރި ޑެމްބެލޭ އަކީ ބާސެލޯނާ އަށް މާ ފައިދާކުރާނެ ކުޅުންތެރިއެއްގެ ގޮތުގައި އެ މީހުން ދެކުނީ،"

ޑޯޓްމަންޑް ދޫކޮށް، ޑެމްބެލޭ ބާސެލޯނާ އަށް ބަދަލުވީ، 2017 ވަނަ އަހަރު 110 މިލިއަން ޑޮލަރުގެ ފީ އަކަށެވެ. މިދިޔަ އަހަރު ބާސެލޯނާ ދޫކޮށް ޑެމްބެލޭ ވަނީ، 55 މިލިއަން ޑޮލަރުގެ ފީ އަކަށް ޕީއެސްޖީ އަށް ބަދަލުވެފަ އެވެ. ޑެމްބެލޭ މިދިޔަ ސީޒަނުގައި ކުޅުނީ އެމްބާޕޭއާ އެކު ޕީއެސްޖީގަ އެވެ.

މިންގޭލާ ބުނީ ބާސެލޯނާ އަށް މި ވަގުތު މަޝްހޫރު ކުޅުންތެރިން ގެންދިއުން ވާނީ އުނދަގޫ ކަމަކަށް ކަމަށާއި އެއީ އެ ކްލަބް މާލީ ގޮތުން ބަލިކަށިވެފައި އޮތުމުން ކަމަށެވެ. އެކަމަކު، ރެއާލް މެޑްރިޑް އޮތީ، އެ ކްލަބްގެ ރައީސް ފްލޮރެންޓީނޯ ޕެރޭޒްގެ މޮޅު ޕްލޭންތަކާ އެކު ވަރަށް އުހުގައި ކަމަށް މިންގޭލާ ބުނެފައިވެ އެވެ.