ނޭޕްލްސް (ޖޫން 6) - އިޓާލިއަން ލީގުގެ ނަޕޯލީގެ ކޯޗަކަށް ޗެލްސީ އާއި ޔުވެންޓަސްގެ ކުރީގެ ކޯޗު އެންޓޯނިއޯ ކޮންޓޭ ހަމަޖައްސައިފި އެވެ.

ނަޕޯލީގެ ކޯޗުކަމާ ކޮންޓޭ ހަވާލުވީ ތިން އަހަރު ދުވަހުގެ އެއްބަސްވުމެއްގަ އެވެ. މިދިޔަ އަހަރު މާޗު މަހު ޓޮޓެންހަމް ހޮޓްސްޕާސްގެ ކޯޗުކަމުން ވަކިވި ފަހުން ކޮންޓޭ ،54، ހުރީ ޓީމަކާ ހަވާލުނުވެ އެވެ.

ޓޮޓެންހަމްގައި ނާކާމިޔާބު ދުވަސްތަކެއް ހޭދަކުރި ނަމަވެސް، ކޮންޓޭ ވަނީ ކޯޗިން ކެރިއަރުގައި މީގެ ކުރިން ގިނަ ކާމިޔާބީތަކެއް ހޯދައިފަ އެވެ.

އެ ގޮތުން، ޗެލްސީއާ އެކު އިނގިރޭސި ޕްރިމިއާ ލީގުގެ ޗެމްޕިއަންކަމާއި އެފްއޭ ކަޕް ކާމިޔާބުކުރިއެވެ. އަދި ޔުވެންޓަސްއާ އެކު 2011 އިން 2014 އަށް ޖެހިޖެހިގެން ތިން ފަހަރު އިޓާލިއަން ލީގުގެ ތަށި ހޯދި އެވެ. އަދި 11 އަހަރުގެ ތެރޭގައި ފުރަތަމަ ފަހަރަށް އިންޓަ މިލާނުން 2021 ވަނަ އަހަރު އިޓާލިއަން ލީގުގެ ޗެމްޕިއަންކަން ހޯދީވެސް ކޮންޓޭގެ އިރުޝާދުގެ ދަށުންނެވެ.

ނަޕޯލީން 33 އަހަރަށް ފަހު މިދިޔަ އަހަރު އިޓާލިއަން ލީގުގެ ޗެމްޕިއަންކަން ހޯދި ނަމަވެސް، ނިމިގެންދިޔަ ސީޒަނަކީ އެ ޓީމަށް ނާކާމިޔާބު ސީޒަނެކެވެ. މިދިޔަ ސީޒަންގައި ނަޕޯލީ ލީގު ނިންމާލީ 10 ވަނައިގަ އެވެ.

ނަޕޯލީގެ ފޯމު ދަށްވެ، އެ ކްލަބުން ވަނީ ސީޒަންގެ ވަކި ހިސާބަކުން ވޯލްޓާ މަރާޒީ ކޯޗުކަމުން ވަކިކޮށް، ކުރު މުއްދަތުގެ އެއްބަސްވުމެއްގައި ސްލޮވާކިއާގެ ކޯޗު ފްރަންޗެސްކޯ ކަލްޒޯނާ އަށް ފެބްރުއަރީ މަހު ކޯޗުކަން ހަވާލުކޮށްފަ އެވެ. ކަލްޒޯނާ އެ ޓީމުގެ ކޯޗުކަމާ ހަވާލުވީ ސީޒަން ނިމެންދެނެވެ.