ށ. ފުނަދޫގައި ސިހުރު ހެދި ކަމުގެ ތުހުމަތުގައި ހައްޔަރުކުރި މީހާ ބަންދުގައި އެއް މަސް ދުވަސް ބެހެއްޓުމަށް ފަހު މިދިޔަ އާދީއްތަ ދުވަހު ދޫކޮށްލައިފި އެވެ.

މި ތުހުމަތުގައި 60 އަހަރުގެ ދިވެހި ފިރިހެނަކު ހައްޔަރުކުރީ މެއި 3، ގަ އެވެ. އެންމެ ފުރަތަމަ ފުނަދޫ މެޖިސްޓްރޭޓް ކޯޓުން އޭނާގެ ބަންދަށް ޖެހީ 15 ދުވަހެވެ. އެ 15 ދުވަސް ނިމުމުން އިތުރު 10 ދުވަސް ކޯޓުން ޖެހި އެވެ. އެންމެ ފަހުން ކޯޓުން ދިނީ ފަސް ދުވަހެވެ.

ފުލުހުން މިއަދު ބުނީ އޭނާގެ ބަންދާ މެދު ގޮތެއް ނިންމުމަށް އެންމެ ފަހުން ކޯޓަށް ގެންދިޔަ ދުވަހު އޭނާ ދޫކޮށްލާފައިވާ ކަމަށެވެ.

އޭނާ ކުރި ކަމެއް ކުރީ ފުނަދޫ ދާއިރާގެ އާ މަޖިލިސް މެންބަރު މުހައްމަދު މަމްދޫހު (މަންޑޭ) އަށް އަމާޒުކޮށް ކަމަށް ބުނެ އޭނާގެ ސަޕޯޓަރުން ނުރުހުން ފާޅުކޮށް އަޑު އުފުލާފައިވެ އެވެ.