ކ. އަތޮޅުގައި އޮންނަ ދިޔަނެރު ފަރަށް އެރި ޓަގަކާއި ބާޖެއްގެ ވެރިފަރާތް 20 މިލިއަން ރުފިޔާއިން އެންވާރަމަންޓަލް ޕްރޮޓެކްޝަން އޭޖެންސީ (އީޕީއޭ) އިން ޖޫރިމަނާކޮށްފި އެވެ.

އެ އޭޖެންސީން މިއަދު ނެރުނު އިއުލާނެއްގައި ބުނީ ސެޕްޓެމްބަރު 23, 2023 ގައި ފަރަށް އެ ބާޖާއި ޓަގު އެރި ކަމަށާއި އޭގެ އެއް ދުވަސްފަހުން އެ ދެ އުޅަނދު ވެސް ފުންކުރި ކަމަށެވެ.

"ފަރަށް ލިބުނު ގެއްލުންތައް ބެލުމުގެ ގޮތުން 28 ސެޕްޓެމްބަރު 2023 ގައި އެ ފަރުގައި އެ އުޅަނދުގެ ވެރިފަރާތުން އައްޔަންކުރި ސާވެޔަރުންނާއެކު ޖޮއިންޓް ސާވޭއެއް ވަނީ ކުރެވިފައި," އީޕީއޭގެ ބަޔާނުގައި ބުނެފައިވެ އެވެ.

"މި އުޅަނދުތައް ފަރަށް އެރި ސަރަޙައްދުތައް ބެލި ބެލުމުން އެ ޓަގު އެރި ސަރަހައްދަށް 804 އަކަމީޓަރުގެ ސަރަޙައްދަކަށް ބޮޑެތި ގެއްލުންތަކެއް ލިބި، ހަލާކުވެފައިވާކަން ވަނީ ފާހަގަކުރެވިފައި. ނަމަވެސް، ބާޖު އެރި ސަރަޙައްދަށް ގެއްލުމެއް ލިބިފައިނުވާކަން ވަނީ ފާހަގަކުރެވިފައި."

އެ އުޅަނދުތަކުގެ ވެރިފަރާތަކީ ދި މިޑްލް އީސްޓް މެރިން އެލްއެލްސީ ކަމަށްވާއިރު އެ އެ ކުންފުނި 20,246,600ރ. (ވިހި މިލިއަން ދެލައްކަ ސާޅީސް ހަހާސް ހަސަތޭކަ ރުފިޔާ) އިން ވަނީ ޖޫރިމަނާކޮށްފަ އެވެ.

އެ ޖޫރިމަނާ 30 ދުވަހުގެ ތެރޭގައި ދެއްކުމަށް އީޕީއޭއިން ވަނީ އަންގާފަ އެވެ.