އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕްގެ ދެ ޗެމްޕިއަނުން ކަމަށްވާ ކްލަބް އީގަލްސް އާއި ކްލަބް ގްރީން ސްޓްރީޓްސް އިން އެއް ގްރޫޕެއްގައި ވާދަކުރަން ޖެހިއްޖެ އެވެ.

މި މަހު ނުވަ ވަނަ ދުވަހު ފަށަން ތާވަލުކޮށްފައިވާ ޔޫތު ޗެމްޕިއަންޝިޕް މި ފަހަރު ކުރިއަށްދަނީ އަށް ޓީމެއްގެ މެދުގަ އެވެ.

މުބާރާތުގެ ގުރުއަތުލުން މިއަދު ބޭއްވިއިރު، މުބާރާތުގެ ދެ ޗެމްޕިއަނުން ހިމެނުނީ އެއް ގްރޫޕެއްގަ އެވެ. އެ ގޮތުން، 2018 ވަނަ އަހަރުގެ ޗެމްޕިއަން، ގްރީން ސްޓްރީޓްސް އާއި 2022 ވަނަ އަހަރުގެ މުބާރާތުގެ ޗެމްޕިއަން، އީގަލްސް އޮތީ ގްރޫޕް ބީގަ އެވެ. ދެން، އެ ގްރޫޕްގައި އޮތީ، މާޒިޔާ ސްޕޯޓްސް އެންޑް ރެކްރިއޭޝަން އާއި ޔުނައިޓެޑް ވިކްޓަރީ އެވެ.

އަލަށް ފުރަތަމަ ޑިވިޝަނުގައި އަދި ޔޫތު ޗެމްޕިއަންޝިޕްގައި ވާދަކުރާ އޮޑި ސްޕޯޓްސް ކްލަބް ހިމެނެނީ، ޓީސީ ސްޕޯޓްސް ކްލަބާއި ބުރު ސްޕޯޓްސް ކްލަބް އަދި ސުޕަ ޔުނައިޓެޑް ސްޕޯޓްސް (ސަސް)އާ އެކު ގްރޫޕް އޭގަ އެވެ.

ފުރަތަމަ ޑިވިޝަނުގައި ބާކީ ހިމެނޭ ދެ ޓީމު ކަމަށްވާ، ވިކްޓަރީ ސްޕޯޓްސް ކްލަބާއި ކްލަބް ވެލެންސިއާ މި ފަހަރު ޔޫތު މުބާރާތުގައި ނުކުޅެ އެވެ. މީގެ ތެރެއިން ވެލެންސިއާ ނުކުޅެނީ، އެ ކްލަބްގެ އިދާރީ މައްސަލައެއްގެ ސަބަބުން އެފްއޭއެމް އިން އެ ޓީމު ސަސްޕެންޑްކޮށްފައި އޮތުމުންނެވެ.

ޔޫތު ޗެމްޕިއަންޝިޕްގެ މެޗުތައް ކުޅެން ޝެޑިއުލުކޮށްފައިވަނީ، ހެނދުނާއި ހަވީރު އެވެ. އެ ގޮތުން، ހެނދުނުގެ މެޗުތައް 8:00 ޖަހާއިރު ފަށާއިރު، ހަވީރު ކުޅޭ މެޗުތައް ފަށާނީ، 16:00 ގަ އެވެ. އެ ގޮތުން، މުބާރާތުގެ ފުރަތަމަ މެޗުގައި މި މަހު، ނުވަ ވަނަ ދުވަހު ހެނދުނު، ޓީސީ ކުޅޭނީ، އޮޑި ސްޕޯޓްސް ކްލަބާ އެވެ.

މުބާރާތުގެ މެޗުތައް ހެނދުނު ކުޅެން ޖެހޭތީ، ގިނަ ޓީމުތަަކަކުން އަންނަނީ ހިތްހަމަނުޖެހުން ފާޅުކުރަމުންނެވެ. މީގެ ކުރިން، އިންޓަ ސްކޫލް ފިޔަވައި، އެއްވެސް ޔޫތު މުބާރާތެއް ހެނދުނު ކުޅެފައިނުވެ އެވެ.