ށ. ބިލެތްފަހީ ފަޅަށް ވަންނަނިކޮށް ނެރު ފައިކަށްޓަށް އުރި، އެ ރަށު ފަޅުތެރެއަށް ކަނޑިތީމު، "އުޅިއަށި ބޯޓު" އަޑިއަށް ހިނގައްޖެ އެވެ.

ކަނޑިތީމު ކައުންސިލުގެ ރައީސް، އަހުމަދު އަހުސަން "އަދަދު" އަށް ވިދާޅުވީ އެ ބޯޓު އަޑިއަށް ގޮސްފައި ވަނީ ގިނަ އަދަދެއްގެ މުދަލާ ވެސް އެކުގައި ކަމަށެވެ. އެހެންނަމަވެސް އޭގެން ދަތުރުކުރި ހުރިހާ އެންމެން ސަލާމަތުން ހިކިފަހަށް ފައިބާފައިވާ ކަމަށް އޭނާ ވިދާޅުވި އެވެ.

"ބިލެތްފަހި ފަޅަށް ވަންނަނިކޮށް ނެރު ފައިކަށީގައި ޖެހިފައި ދިޔަ ވާން ފެށީ، ބޯޓުގެ މަތިން ފަސޭހައި ނެގެން ހުރި މުދާކޮޅު އެކަނި ސަލާމަތް ކުރެވުނީ، ސިމެންތި، ހަނޑޫ ހަކުރު ފުށް އެއްކޮށް އެހުރީ ބޯޓާއެކު ފެނު އަޑީގައި،" އަހުސަން ވިދާޅުވި އެވެ.

އުޅިއަށި ބޯޓަކީ އެ އަތޮޅު ފަސް ރަށަށް މާލެއިން މުދާ އުފުލާ 100 ފޫޓުގެ ބޮޑު ބޯޓެކެވެ. އެހެންކަމުން އެ ބޯޓު އަޑިއަށްދިޔުމުގެ ސަބަބުން ވީ ގެއްލުމުގެ ތަފުސީލެއް އަދި ނޭނގޭ ކަމަށް އަހުސަން ވިދޅާުވި އެވެ.

ބިލެތްފަހީ ކައުންސިލުން ސޯޝަލްމީޑިއާގައި ކުރި ޕޯސްޓެއްގައި ބުނީ ބިލެތްފަހި ރައްޔިތުންގެ އެއްބާރުލުމާއި އެހީތެރިކަމާއެކު އެ ބޯޓުގައި ހުރި މުދާ ސަލާމަތްކޮށް ބޯޓު ތިލަ ކުރުމުގެ މަސައްކަތް ކުރަމުންދާ ކަމަށެވެ.

"މިހާރު ބޯޓު އޮތީ އެއްކޮށް އަޑީގައި، ދެން ބެލޫން ޖަގައިގެން ބޯޓު ނެގޭތޯ މަސައްކަތް ކުރަމުން އެދަނީ،" އަހުސަން ވިދާޅުވި އެވެ.