ރާއްޖޭގެ ހުރިހާ ސްކޫލްތަކަށް ބޭނުންވާ ފޮތްތައް ފޮނުވާފައިވާ ކަމަށް އެޑިއުކޭޝަނުން ބުނި ނަމަވެސް ބައެއް ސްކޫލްތަކަށް ބޭނުންވާ ފޮތްތައް އެއްކޮށް ހަމައަށް ލިބިފައި ނުވާކަން އެނގިއްޖެ އެވެ.

އެޑިއުކޭޝަން މިނިސްޓަރީން މީޑިއާތަކަށް ފޮނުވި މެސެޖެއްގައި ބުނީ ރާއްޖޭގެ ހުރިހާ ސްކޫލްތަކަށް ބޭނުންވާ ފޮތްތައް ފޮނުވައި ނިމިފައިވާ ކަމަށެވެ.

ނަމަވެސް އެކަމުގެ މައުލޫމާތު އެނގޭ، މިނިސްޓަރީގެ އޮފިޝަލެއް "އަދަދު" އަށް ބުނީ އިންޓަނޭޝަނަލް ސްކޫލްތަކުން ސަރުކާރު ސްކޫލްތަކަށް ބަދަލުވި ކުދިންނަށާއި ފޮތް އިތުރަށް ބޭނުންވާ ސްކޫލްތަަކަށް ބޭނުންވާ ފޮތްތައް ރަށްރަށަށް ފޮނުވާފައިވީ ނަމަވެސް އެ ކުދިންނަށް ފޮތްތައް ލިބޭނީ މާދަމާ ކަމަށެވެ.

އަދި އަރަބި ލޭންގުއޭޖު ކިޔަވާ ދަރިވަރުންގެ ފޮތްތައް ހަމަވާނެ ދުވަހެއް ނުވެސް އެނގޭ ކަމަށް އޭނާ ވިދާޅުވި އެވެ.

"އަތޮޅު ތެރޭގެ ރަށްރަށަށް ވެސް އަދި ބޯޓުތައް ފޮތް ހިފައިގެން އެ ވަންނަނީ، އަރަބިކް ލޭންގުއޭޖު ކިޔަވާ ދަރިވަރުންނަށް ފޮތް ހަމަވާނެ ދުވަހެއް އަދިވެސް ނޭނގޭ،" ނަން ނުޖެހުމަށް ޝަރުތުކޮށް އެޑިއުކޭޝަނުން ވާހަކަދެއްކެވި އޮފިޝަލް ވިދާޅުވި އެވެ.

އެޑިއުކޭޝަނުން މިއަދު ބުނީ އެއް ސްކޫލުން އަނެއް ސްކޫލަށް ދަރިވަރުން ބަދަލުވުމުގެ ސަބަބުން ބައެއް ސްކޫލްތަކަށް ފޮތް ގިނަވެ މަދު އަދަދެއްގެ ފޮތްތައް ބައެއް ސްކޫލްތަކުން މަދުވުމަކީ އާންމުކޮށް ހިނގާކަމެއް ކަމަށެވެ.

"މިފަހަރު ވެސް މިފަދަ ސިޗުއޭޝަންތައް މަދުން ނަމަވެސް ހުރުން އެކަށީގެންވޭ، ނަމަވެސް ޖުމުލަކޮށް ބަލާނަމަ، ފޮތް ރަނގަޅަށް ޑިސްޓްރިބިއުޓް ކުރެވިފައި ވަނީ،" އެޑިއުކޭޝަނުގެ މެސެޖުގައި ބުނެފައިވެ އެވެ.

އެޑިއުކޭޝަނުން އެހެން ބުނި ނަމަވެސް މާލޭގެ ސްކޫލްތަކުގައި ކިޔަވާ ކުދީންނަށް ވެސް ބައެއް ފޮތްތައް އަދި ނުލިބޭ ކަމަށް އެކުދީންގެ ބެލެނިވެރިން ވަނީ "އަދަދު" އަށް ކިޔައިދީފަ އެވެ.

އެގޮތުން ހުރަވީ ސްކޫލުގައި ކިޔަވާ ކުއްޖެއްގެ ބެލެނިވެރިޔަކު ބުނީ އަދިވެސް ބައެއް ފޮތްތައް ސްކޫލުން ނުދޭ ކަމަށެވެ. އަދި ފޮތް ލިބޭނެ ވަކި ދުވަހެއް ވެސް ނާންގާ ކަމަށް އޭނާ ބުންޏެވެ.

މިއަހަރުގެ ކިޔެވުން ފެށީ 96،000 އަށްވުރެ ގިނަ ދަރިވަރުންނާ އެކު އެވެ. އެއީ 40،300 އަންހެން ދަރިވަރުންނާއި 42،700 ފިރިހެން ދަރިވަރުންނެވެ. އޭގެތެރެއިން 83،000 އެއްހައި ދަރިވަރުން ތައުލީމު ހާސިލު ކުރަމުންދަނީ ސަރުކާރުގެ ސްކޫލްތަކުގަ އެވެ.

އެޑިއުކޭޝަން މިނިސްޓަރީގެ ތަފާސް ހިސާބުތައް ދައްކާގޮތުން ސަރުކާރު ސްކޫލްތަކުގައި ތައުލީމު ހާސިލު ކުރާ ދަރިވަރުންގެ ތެރެއިން 17،000 އެއްހައި ދަރިވަރުންނަކީ މާލޭ ސަރަހައްދުގައި ތައުލީމު ހާސިލު ކުރަމުންދާ ދަރިވަރުންނެވެ.

މުޅި ރާއްޖެއަށް ބަލާއިރު، އެލްކޭޖީއިން ފެށިގެން ގުރޭޑު 12 އާ ހަމައަށް ޕްރައިވެޓް ސްކޫލްތަކުގައި ތައުލީމު ހާސިލު ކުރަމުންދާ 13،000 ދަރިވަރުން ތިބިއިރު، އޭގެތެރެއިން 9000 ދަރިވަރުން ކިޔަވަނީ މާލޭ ސަރަހައްދުގައި ހުންނަ ސްކޫލްތަކުންނެވެ.

ކިޔަވާ ކުދީންގެ ފޮތްތައް ހަމަނުވާ މައްސަލައިގައި އިދިކޮޅު އެމްޑީޕީންނާއި ޕީއެންއެފުން ވަނީ ކަންބޮޑުވުން ފާޅުކޮށްފަ އެވެ.