މި ވެރިކަމުގެ ފުރަތަމަ 100 ދުވަހު ފެށި ކަމަށް ސަރުކާރުން މީގެ ކުރިން ބުނި އަރަބިއްޔާ ސްކޫލުގެ އާ އިމާރާތް އެޅުމުގެ މަސައްކަތް ފެށޭނީ މި ފެށޭ ޖޫން މަހުގެ ތެރޭ އެ ބިން ހުސްވުމުން ކަމަށް އެޑިއުކޭޝަނުން ބުނެފި އެވެ.

އެޑިއުކޭޝަން މިނިސްޓްރީން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ އަރަބިއްޔާ ސްކޫލު އަޅަން ހަމަޖެހިފައިވާ ބިން ހުސްކުރުމުގެ މަސައްކަތް ޖޫން މަހު ނިމޭނެ ކަމަށް މީގެ ކުރިން އެ ބިން ހަވާލުކޮށްފައި އޮތް އާރުޑީސީ އިން އަންގާފައިވާ ކަމަށެވެ.

"ބިން ހުސްވުމާ އެކީ އަރަބިއްޔާ ސްކޫލު އިމާރާތުގެ ކޮންކްރީޓް މަސައްކަތް ފެށޭނެ، ކޮންސެޕްޓް ފައިނަލް ވެ ހުރިހާ ޓެކްނިކަލް މަސައްކަތްތަކެއް މިހާރު ވަނީ ގާތްގަނޑަކަށް ނިމިފައި،" އެޑިއުކޭޝަނުން ބުންޏެވެ.

އަމިން ކޮންސްޓްރަކްޝަން އާ ހަވާލުކޮށްގެން ކުރިއަށް ގެންދާ މި މަޝްރޫއުގެ އަމަލީ މަސައްކަތް ފެށި ކަމަށް މީގެ ކުރިން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވަނީ ވިދާޅުވެފަ އެވެ.

"މިހާރު [އަމަލީ] މަސައްކަތް އެ ފެއްޓީ ނޫންތޯ؟ މިއަދުން ފައްޓައިގެން އަމަލ މަސައްކަތް ހިނގަމުން ދާނީ. ހަމަ ބިން ކޮނުމާއި ބިންގާ އެޅުމުގެ މަސައްކަތް، ހަމަ އަމަލީ މަސައްކަތް ފެއްޓިގެން އެ ދިޔައީ،" ފެބްރުއަރީ 24، ގައި މިނިސްޓަރު އަދަދު ނޫހަށް ވިދާޅުވި އެވެ.

އެތަނުގައި އަމަލީ އެއްވެސް މަސައްކަތެއް ކުރިއަށް ދާތަން ނުފެންނާތީ، އެއީ ކީއްވެގެންތޯ ސުވާލުކުރުމުން މިނިސްޓަރު ވިދާޅުވީ އިމާރާތް ކުރާ ކޮށި އަމިން ކޮންސްޓްރަކްޝަންއާ ހަވާލު ކުރީ މިއަދު ކަމަށެވެ. އަދި ޝެޑިއުލާ އެއްގޮތަށް މަސައްކަތްތައް ފެށިގެންދާނެ ކަމަށް ވިދާޅުވި އެވެ.

އަރަބިއްޔާ ސްކޫލުގެ މަސައްކަތް ފެށި ކަމަށް ސަރުކާރުން ފާހަގަކުރި ހަފުތާ 14 ގައި ހިމަނާ، އެ މަސައްކަތް ބައްލަވާލައްވަން ފެބްރުއަރީ 24، ގައި މިނިސްޓަރު ވަޑައިގެންނެވި ކަމަށް ބުނެ އެޑިއުކޭޝަނުން ސޯޝަލް މީޑިއާގައި ޕޯސްޓުވެސް ކުރި އެވެ.

ނަމަވެސް އޭގެ ފަހުން، ކުރިން މަސައްކަތް ފެށި ކުރެހުމަށް ބަދަލު ގެނެސް، އަންޑަ ގްރައުންޑް ޕާކިންއެއް އިތުރުކޮށް، ގެންނަ ބަދަލުތައް ޓެންޑާ ބޯޑަށް ފޮނުވުމަށް ތައްޔާރުވަމުން އަންނަ ކަމަށް އެޕްރީލް 30، ގައި މިނިސްޓަރު ވިދާޅުވި އެވެ. ބެލެވޭ ގޮތުގައި އެ ބަދަލުތައް ގެނެސް އާ އެއްބަސްވުމެއްގައި މިހާރު ވަނީ ސޮއިކުރެވިފަ އެވެ.

މި ލަސްތައް އައި ނަމަވެސް ސްކޫލުގެ މަސައްކަތް ދެ އަހަރު ދުވަސް ތެރޭގައި ނިންމައި ޖެނުއަރީ، 2026 ގައި ކިޔަވައި ދެވޭނެ ކަމުގެ ވަރަށް ބޮޑު ޔަގީންކަމެއް މިނިސްޓަރު ދެއްވި އެވެ.

އަރަބިއްޔާ ސްކޫލް އިމާރާތް ކުރުމަށް އަމީން ކޮންސްޓްރަކްޝަންއާ ހަވާލުކުރީ 168.5 މިލިއަން ރުފިޔާއަށެވެ. ނަމަވެސް ކުރެހުމަށް ގެންނަ ބަދަލާއެކު މި އަގު އިތުރުވެގެންދާނެ އެވެ. މިނިސްޓަރު މި އަގު ވިދާޅެއް ނުވެ އެވެ.