ރައީސް ޑރ. މުހައްމަދު މުއިއްޒު، ރައްޔިތުންގެ މަޖިލީހުގެ އަޣުލަބިއްޔަތު ހޯއްދަަަވަން ކުރެއްވި ކެމްޕެއިނުގައި ދެއްކެވި އެއް ބަހަނާ އަކީ އެމަނިކުފާނުގެ މެނިފެސްޓޯ ތަންފީޒުކުރުމަށް ޓަކައި ގެންނަން ޖެހޭ ގާނޫނީ ބޮޑެތި ބަދަލުތަކެވެ. އޭޕްރިލް 2، ގައި ހުޅުމާލޭގައި ބޭއްވި ޖަލްސާއެއްގައި އެމަނިކުފާނު ވިދާޅުވީ ވައުދުތައް ފުއްދެވުމަށް ޓަކައި އިސްލާހާއި އާ ބިލު ހިމެނޭ ގޮތުން 200 އަށް ވުރެ ގިނަ ބިލު ފާސްކުރަން ޖެހޭ ކަމަށެވެ.

"އެފަދަ ބިލްތަކާއި މިފަދަ އެތަށް ކަމެއް ހިމެނޭ ގޮތަށް މުޅި މެނިފެސްޓޯގައި ހުރި މިހުރިހާ ވައުދެއް ފުއްދުމަށް 200 އަށް ވުރެ ގިނަ އިސްލާހާ، އާ ބިލުތައް ފާސްކުރުމަށް މަޖިލީހުގެ އެހީތެރިކަން ބޭނުންވޭ،" އެމަނިކުފާނު އޭރު ވިދާޅުވި އެވެ.

ރައްޔިތުންގެ މަޖިލީހުގައި ބިލެއްގެ މަސައްކަތް ނިންމަން އޮންނަ އިޖުރާއަތްތަކަށް ބަލާއިރު އެ އަދަދަށް ބިލު ފާސްކުރުމަކީ ވަރަށް ގިނަ މަަސައްކަތާއި ބޮޑެތި ބަހުސްތައް ހިންގަން ޖެހޭނެ ކަމެކެވެ.

މަޖިލީހުގައި ބިލެއް ފާސްކުރުމަށް ކުރާ މަސައްކަތްތައް

ރައްޔިތުންގެ މަޖިލީހަށް މެމްބަރަކު ބިލެއް ހުށަހެޅުއްވުމުން އިދާރީ ގޮތުން ބަލަން ޖެހޭ ކަންތައްތައް ބެލުމަށް ފަހު ފުރަތަަމަ ކުރާ ކަަމަކީ ބިލުގެ ފުރަތަަަމަ ކިއުން އިއްވުމެވެ. އެއީ ޖަލްސާއެއްގެ އެޖެންޑާ އިއުލާނު ކުރުމަށް ފަހު، ބިލު ހުށަހެޅުއްވި މެމްބަރުގެ ނަމާއި ބިލުގެ ނަން ރިޔާސަތުން އިއްވުމެވެ. އެ ބިލަކަށް ކުރާ ފުރަތަމަ ބަހުސް (އިބްތިދާއީ ބަހުސް) ކުރާނީ އަދި އޭގެ ފަހުން ބާއްވާ ޖަލްސާއެއްގަ އެވެ.

ވިހި ވަނަ ރައްޔިތުންގެ މަޖިލީހުގައި ޖުމްލަ 93 މެމްބަރުން އެބަތިއްބެވި އެވެ. އެހެންވީމާ އިބްތިދާއީ ބަހުސްގައި އޭގެ ތެރެއިން ދެބައިކުޅަ އެއްބައި މެމްބަރުން ބައިވެރިވެވަޑައިގެންނެވިޔަސް އެކަަމަށް ވަރަށް ގިނަ ވަގުތު ހޭދަވާނެ އެވެ.

ބިލު މަޖިލީހަށް ބަލައިގަތުމާ މެދު ގޮތެއް ނިންމާނީ އިބްތިދާއީ ބަހުސް ނިިިމިގެންނެެވެ. އެއަށް ފަހު ބިލު ފޮނުވާނީ ކަމާ ބެހޭ ކޮމިޓީއަށެވެ. ކޮމިޓީން ބިލު ދިރާސާކުރާ އިރު ކަމާ ބެހޭ އެންމެހާ އިދާރާތަކުގެ ހިޔާލާއި މަޝްވަރާ ހޯދާނެ އެވެ. އެއީ ކޮމިޓީގެ ބައްދަލުވުުންތަކަށް ބޭފުޅުން ހާޒިރުކޮށްގެންނާއި ބައެއް ފަހަރު ލިޔުމުންނެވެ. ބައެއް ބިލުތަކަށް އާއްމުންގެ ހިޔާލު ވެސް ހޯދަން ޖެހޭނެ އެެވެ.

އެހުރިހާ ކަމަކަށް ފަހު އެކުލަވައިލާ ކޮމިޓީ ރިޕޯޓް އަނެއްކާ ވެސް ހުށަހަޅާނީ މަޖިލީހުގެ ތަޅުމަށެވެ. އެތަނުގައި ކުރާ ބަހުސްގައި އެ ރިޕޯޓަށް އިސްލާހު ހުށަހެޅުުމުގެ ފުރުސަތު ވެސް މެމްބަރުންނަށް އޮންނާނެ އެެވެ.

ބިލު ފާސްކުރުުމުގެ މަރުހަލާގައި އެފަދަ އިސްލާހުތަކެއް ހުރެއްޖެ ނަަމަ އެއީ ވެސް ވަކިވަކި ވޯޓުތަކެކެވެ. މިހުުރިހާ މަރުހަލާއެއް ނުވަތަ މީގެ ތެރެއިން ބޮޑު ބައެއް، 200 ބިލަށް ފުރިހަަމަކުރާ އިރު ހޭދަވާނެ ވަގުތު މިވަރުން ތަސައްްވުރުކޮށްލެވޭނެ އެވެ.

މިކަންތައްތައް މިހެން ކުރިއަށް ދާއިރު، މެމްބަރުން އަމިއްލަ ގޮތުން ހުށަހަޅުއްވާ ބިލުތަކާއި ކުއްލި މައްސަލަތަކާއި, މައްސަލަތައް އަދި ގަރާރުތަކުގެ ބަހުސްތައް ވެސް މަޖިލީހުގައި ކުރިއަށް ދާނެ އެވެ.

ޕީއެންސީގެ ބޮޑު އަޣުލަބިއްޔަތުގެ ތަސައްވުރު

މަޖިލީހުގެ ރައީސްކަމަށް ޕީއެންސީން ހުށަހަޅާ، ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވަނީ ރައީސް ޕީއެންސީގެ ސުޕަމެޖޯރިޓީ އޮތް 20 ވަނަ މަޖިލީހުން މަސައްކަތް ކުރިއަށް ގެންދާނެ ގޮތުގެ ކޮންމެވެސް ވަރެއްގެ ތަސައްވުރެއް މީގެ ކުޑަ ދުވަސްކޮޅެއް ކުރިން ދެއްވައިފަ އެވެ.

ދައުލަތުގެ މީޑިއާ ޕީއެސްއެމް އަށް ދެއްވި އިންޓަވިއުއެއްގައި އަބްދުއް ރަހީމް ވިދާޅުވި ގޮތުގައި 20 ވަނަ ރައްުޔިތުންގެ މަޖިލީހުގެ މުޅި އަމާޒަކަށް ވާނީ ރައީސް މެނިފެސްޓޯ ތަންފީޒުކުރުމަށް ޓަކައި މަޖިލީހުން ދޭން ޖެހޭ އެހީތެރިކަމާއި އެއްބާރުލުން ދިނުމެވެ. އެ އެހީތެރިކަން ދޭނީ އެމަނިކުފާނު ވިދާޅުވި ގޮތުގައި އެންމެ އަވަސް މަގަކުންނެވެ.

"އަޅުގަނޑުމެންގެ އަމިއްލަ ފައިދާއަށް، އަމިއްލަ މަސްލަހަތަށް އިރާދަކުރެއްވިއްޔާ މަޖިލިސް ތެރޭގައި އަޅުގަނޑުމެން ކަމެއް ނުކުރާނަން،" އަބްދުއް ރަހީމް ވިދާޅުވި އެެވެ.

އޭނާ ދެެއްވި ޔަގީންކަމަކީ މަޖިލީހުގެ ތަޅުމުގަައި ވަގުތު ގެއްލޭ ގޮތަށް މީގެ ކުރިން ފެނުނު ފަދަ މައްސަލަތައް މި މި މަޖިލީހުން ނުފެންނާނެ ކަމުގެ ޔަގީންކަމެވެ.

އަބްދުއްރަހީމްގެ އެވާހަކައާ އެއްގޮތަށް ކުރިއަށް ދާ ނަަމަ ކުއްލި މައްސަލަތަކާއި ގަރާރުތައް މަދުވާނެ އެވެ.

"މި މަޖިލީހެއް ނުވާނެ ސަރުކާރަށް ނޮހޮރުއްޕާން ކުރާ މަޖިލީހަކަށް، ސަރުކާރަށް ދަތިކުރާ މަޖިލީހަކަށެއް، މިމަޖިލިސް ވާނީ ސަރުކާރަށް އެއްބާރުލުންދޭ، ގުޅިގެން، އެކީގައި މަސައްކަތްކުރާ މަޖިލީހަކަށް،" އަބްދުއް ރަހީމް އޭރު ވިދާޅުވި އެވެ.

އަބްދުއްރަހީމް އެ ވިދާޅުވި ގޮތަށް ކުރިއަށް ދާ ނަަމަ، ދާއިރާގެ ރައްޔިތުންގެ ކަންބޮޑުވުންތައް މަޖިލީހުގައި އިއްވުމުގެ ފުރުސަތު ކުޑަވާނެ އެވެ. އޭގެ ބަދަލުގައި އަބަދުވެސް ފެންނާނީ ސަރުކާރުން އެދޭހާ ކަމެއް، އެދޭހާ ގޮތަކަށް ނިންމާ ތަނެވެ.

ސިޔާސީ އިސްތިލާހުގައި އެއަށް ކިޔަނީ "ރަބަރު ސްޓޭމްޕް" ޖެހުމެވެ.