ހުޅުމާލެ ޖަލުގައި ހުކުމް ތަންފީޒުކުރަމުން ދިޔަ 83 އަހަރުގެ ގައިދީއަކު މިއަދު މަރުވެއްޖެ އެވެ.

ކަރެކްޝަންސް އިން ބުނި ގޮތުގައި މަރުވީ ތ. ތިމަރަފުށީ، މިނިވަން އައްސޭރި، އާދަމް އަލި މަނިކެވެ.

އޭނާ ނުހޭލައިގެން، އެ ގޮޅީގައި ތިބި އެހެން ގައިދީން ޑިއުޓީ އޮފިސަރުންނަށް އެންގުމުން، މެޑިކަލް ސެންޓަރަށް ގެންދިޔައިރު ވެސް ހަރަކާތް ނުކުރާތީ ހުޅުމާލެ ހޮސްޕިޓަލަށް އިމަޖެންސީގައި ގެންދިޔަ ކަމަށް ކަރެކްޝަނުން ބުންޏެވެ.

މެންދުރު 12:00 ޖަހާއިރު ހުޅުމާލެ ހޮސްޕިޓަލަށް ގެންދިޔައިރު އޭގެ 30 މިނެޓު ވަން ދެން ފަރުވާ ދިނުމުން ވެސް ހަރަކާތެއް ނުކުރެ އެވެ. އަދި އޭގެފަހުން އޭނާ މަރުވީ ކަމަށް ކަނޑައެޅި އެވެ.

އޭނާއަކީ ހަކުރު ބަލި، ކިޑްނީ އަދި ކުޑަކަމުދާ ނިޒާމިގެ ބަލި، ކޮލެސްޓްރޯލް، ހައިޕާޓެންޝަން އަދި ލޮލުގެ ބަލި ފަދަ ގިނަ ބަލިތަކަށް ބޭސްކުރަމުން އައި މީހެއް ކަމަށް ކަރެކްޝަނުން ބުންޏެވެ.

އޭނާގެ އާއިލާއަށާއި އިންސްޕެކްޓާ އޮފް ކަރެކްޝަނަލް ސާވިސްއަށާއި މޯލްޑިވްސް ޕޮލިސް ސާވިސްއަށާއި ހިއުމަން ރައިޓްސް ކޮމިޝަން އަދި ނެޝަނަލް އިންޓެގްރިޓީ ކޮމިޝަނަށް އެ މަރުގެ ހަބަރު އަންގާފައިވާނެ ކަމަށް ކަރެކްޝަންސް އިން ބުންޏެވެ.