ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒުގައި ފަރުވާ ހޯދަމުން އަންނަ މީހުންނަށް ހުނަރު ދަސްކޮށްދިނުމަށް ޕްރޮގްރާމްތަކެއް ފަށައިފި އެވެ.

ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ބުނި ގޮތުގައި ހުނަރު ދަސްކޮށްދިނުމުގެ ޕްރޮގްރާމްތަކެއް މަރުކަޒުގައި ފެށީ, މަރުކަޒުގައި ތިބި މީހުން މުޖުތަމައަށް ހަވާލު ކުރުމަށް ބަލާއިރު, އެ މީހުން ހެލިފެލިވެ އުޅުމުގަ އާއި ވަކި ތާވަލަށް ދުވަހުގެ ކަންކަން ބަހާލައިގެން ކުރުމުގައި އުނދަގޫތަކެއް ކުރިމަތިވާތީ ކަމަށެވެ.

އާ ހުނަރުތައް ދަސްކޮށްދިނުމުގެ ގޮތުން, ޕޮލިޓެކްނިކާ ގުޅިގެން މިދިޔަ ހަފުތާގައި ކޭކު ކޯހެއް ކުރިއަށް ގެންދިޔަކަން މިނިސްޓްރީން ފާހަގަކުރެ އެވެ. މިނިސްޓްރީން ބުނީ, މިހާތަނަށް 10 މީހަކު ކޭކު އެޅުމުގެ ކޯސް ފުރިހަމަކޮށްފައިވާ ކަމަށެވެ.

"މިފަދަ ހުނަރު ޕްރޮގްރާމްތައް ކުރިއަށް ގެންދިއުމުގެ އެންމެ މުހިންމު މަގުސަދަކީ މި ވުޒާރާގެ ބެލެނިވަރިކަމުގެ ދަށުގައި ފަރުވާ ހޯދަމުން އަންނަ ކޮންމެ ފަރާތަކީ އަބުރުވެރި، އުފާވެރި، އަދި އަމިއްލަ މިނިވަންކަމާއެކު ދިރިއުޅުމުގެ ފުރުސަތު ލިބިގެންވާ ފަރާތަކަށް ހެދުން," މިނިސްޓްރީން ނެރުނު ނޫސްބަޔާނުގައި ބުންޏެވެ.

މަރުކަޒުގައި ތިބި މީހުން މުޖުތަމައަށް ހަވާލުކުރަން ތައްޔާރު ކުރުމުގެ ގޮތުން އެ މީހުންގެ ޖިސްމާނީ އަދި ނަފްސާނީ ދުޅަހެޔޮކަން އިތުރުކޮށް, އިޖުތިމާއީ ގުޅުންތައް ބަދަހިކުރުމުގެ ގޮތުން ކަސްރަތު ޕްރޮގްރާމުތަކާއި, އިޖުތިމާއީ އެއްވުންތައް ވެސް ކުރިއަށް ގެންދާ ކަމަށް މިނިސްޓްރީން ބުންޏެވެ.

މީގެ އިތުރުން ވެސް އެކި މުއައްސަސާތަކާއި އަމިއްލަ ފަރާތްތަކާ ގުޅިގެން ގިނަ ޕްރޮގްރަމްތަކެއް ގުރައިދޫ މަރުކަޒުގައި ކުރިއަށް ގެންދަން ރާވާފައިވާކަން ފާހަގަކޮށް ސޯޝަލް މިނިސްޓްރީން ބުނީ, ގަސް އިންދުމާއި, ފެހުމާއި, ކުރެހުމާއި އަތު މަސައްކަތުގެ ހުނަރު ދަސްކޮށްދޭ ޕްރޮގްރާމްތައް ވެސް ބާއްވަން ހަމަޖެހިފައިވާ ކަމަށެވެ.

ގުރައިދޫ މަރުކަޒުގައި މިހާރު 220 މީހުން ތިބިއިރު އޭގެ ތެރޭގައި ހިމެނެނީ 133 ފިރިހެނުންނާއި, 87 އަންހެނުންނާއި، އެނދުމަތިވެފައިވާ 15 މީހުން އަދި ނަފްސާނީ ގޮތުން ބަލި 183 މީހުންނެވެ. މީގެ ތެރޭގައި 65 އަހަރުން މަތީގެ 31 މީހުން ހިމެނެ އެވެ.

ސޯޝަލް މިނިސްޓްރީން ބުނި ގޮތުގައި މިހާރު އެ މަރުކަޒުގައި ބޭނުން ކުރަމުން އަންނަ މޮޑެލްގެ ދަށުން ފަރުވާއާއި، ރީހެބިލިޓޭޝަންގެ އިތުރުން، މަރުކަޒުގައި ފަރުވާ ހޯދަމުން އަންނަ ފަރާތްތައް މުޖުތަމައަށް އަނބުރާ ހަވާލުކުރުމަށް ބޮޑު އިސްކަމެއްދެ އެވެ. އެގޮތުން މިދިޔަ ހަ މަސް ދުވަހުގެ ތެރޭގައި 15 ފަރާތެއްވަނީ އާއިލާތާކާއި އަނބުރާ ހަވާލުކޮށްފައިވާ ކަމަށް އެ މިނިސްޓްރީން ބުންޏެވެ.